ევროპული საქართველოს ერთ-ერთი ლიდერმა, გიგი უგულავამ ალეკო ელისაშვილი და ლევან იოსელიანი იუდას შეადარა. პალიტრანიუსის ეთერში უგულავამ განაცხადა, რომ იუდას როლში ყოფნა მათი არჩევანია და ამაში წარმატებას ვერ უსურვებს.

"მათ მე ვერ ვუსურვებ წარმატებას, იმიტომ, რომ ისეთი ნაბიჯის გადადგმას აპირებენ რომელიც საკუთარ თავს და ქვეყანასაც დააზიანებს, მაგრამ, ბოიკოტი მაინც შედგება. მინდა შეგახსენოთ, რომ ყველა პროცესს ყავს თავისი იუდა. თუ ვინმე ამ როლის შესრულებას გადაწყვეტს, ძაან უმადური როლია ისტორიულად, ცნობილია, მაგრამ, გადაწყვიტეს და ეს მათი არჩევანია.

ბოიკოტი შედგება, იმიტომ, რომ ვთვლით, რომ არჩევნები გაყალბებულია და გაყალბებული არჩევნების "გაპრავება" ვერანაირად ვერ მოხდება. გამოსავალი არის მხოლოდ და მხოლოდ რიგგარეშე არჩევნები და მე დარწმუნებული ვარ, რომ ქართული ოცნება აუცილებლად მივა ამ რიგგარეშე არჩევნებამდე", — განაცხადა გიგი უგულავამ.

ხვალ მეათე მოწვევის პარლამენტის პირველი სხდომა უნდა ჩატარდეს, რომელსაც ოპოზიცია არ დაესწრება. ბარიერგადალახული ოპოზიციური პარტიები 31 ოქტომბრის არჩევნების შედეგებს არ აღიარებენ და მანდატებზე უარს ამბობენ. ისინი გეგმავენ, რომ სხდომის პარალელურად ხელი მოაწერონ ერთობლივ განცხადებას, რომლითაც სადეპუტატო მანდატებზე უარს იტყვიან.

9 დეკემბერს პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

როგორც ელისაშვილმა მოგვიანებით განმარტა, ქართულმა ოცნებამ დაიხია ყველა საკითხზე, რომელიც ოპოზიციამ მოლაპარაკებების მაგიდასთან დააყენა. მისივე თქმით, ევროპული საქართველო მოლაპარაკებების ჩაშლას ცდილობს.

გაიგეთ მეტი: