მმართველი პარტიის ერთ-ერთი ლიდერის, ირაკლი კობახიძის თქმით, ნაციონალური მოძრაობა საპარლამენტო მანდატებზე უარის თქმით ქართული ოცნების გასაკეთებელ საქმეს აკეთებს და საკუთარ თავს ინადგურებს. ამის შესახებ მან იმედის ეთერში განაცხადა.

"როდესაც ნაციონალური მოძრაობის წარმომადგენლები ამბობენ უარს მანდატებზე საქართველოს პარლამენტში, ამით ისინი საბოლოოდ აკეთებენ იმ საქმეს, რომელიც ჩვენ უნდა გაგვეკეთებინა. ეს არის ძალიან სწორი და ჯანსაღი პროცესი. ყველაფერს აქვს ბუნებაში თავისი კანონზომიერება და ეს არის, მე ვფიქრობ, ძალიან კანონზომიერი პროცესია, როდესაც პოლიტიკური პარტია, რომელსაც არ ეკუთვნის ქართულ დემოკრატიულ სისტემაში ყოფნა, თვითონ ინადგურებს საკუთარ თავს", — ამბობს კობახიძე.

კობახიძის აზრით, ნაციონალური მოძრობა და ევროპული საქართველო არის "სიმსივნე" ქართულ პოლიტიკაში.

"ისინი თვითონ გადიან პოლიტიკური სივრციდან, რაც არის ძალიან ჯანსაღი და კანონზომიერი პროცესი და ამისთვის მათ პირველად, ალბათ, მადლობა უნდა გადავუხადო", — ამბობს კობახიძე.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და არჩევნების მეორე ტურსაც ბოიკოტი გამოუცხადეს, რომელიც 21 ნოემბერს ჩატარდა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მეოთხე რაუნდი 8 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ განაცხადეს, იყო საკითხები, რომლებზეც თანხვედრა მოხდა, თუმცა, დარჩა რამდენიმე პრინციპული თემა, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება.

მოსალოდნელია, რომ მოლაპარაკებების მეხუთე რაუნდი პარლამენტის პირველ სხდომამდე ერთი დღით ადრე, 10 დეკემბერს გაიმართება.