პარტია მოქალაქეების ერთ-ერთი ლიდერი, ლევან იოსელიანის თქმით, თუ პარტია დარწმუნდება, რომ შეთანხმება ქვეყნისთვის წინგადადგმული ნაბიჯია, პარტია პარლამენტში შევა. მისივე თქმით, პოლიტიკაში არ მოღვაწეობს იმისთვის, რომ ბოკერიასთან ერთად ქუჩაში იდგეს. ამის შესახებ მან რუსთავი 2-ზე გადაცემა დღის კურიერში ისაუბრა.

"ჩვენ თუ დავრწმუნდებით, რომ ეს შეთანხმება ამ ქვეყნისთვის წინგადადგმული ნაბიჯია, რა თქმა უნდა, შევალთ პარლამენტში, აბა პოლიტიკაში რისთვის ვართ? ბოკერიასთან ერთად ქუჩაში ვიდგე? არა! იმისთვის, რომ ამ ქვეყნისთვის თუ მივაღწევ რაღაცა უკეთესს, რა თქმა უნდა, შევალ პარლამენტში და მერე პარლამენტში გავაგრძელებ", — ამბობს იოსელიანი.

დღეს, 9 დეკემბერს პარტია მოქალაქეების ლიდერმა, ალეკო ელისაშვილმა განაცხადა, რომ პარლამენტში იმ შემთხვევაში შევა, თუ ელჩებთან მოლაპარაკებების პროცესში საარჩევნო კანონმდებლობისა და საარჩევნო ადმინისტრაციების რეფორმებზე შეთანხმდებიან. მისი თქმით, მხოლოდ ეს რომ მოიპოვოს და პოლიტიკაში სხვა არაფერი გამოუვიდეს, მთელი ცხოვრება კმაყოფილი იქნება. Facebook ლაივში მან ასევე აღნიშნა, რომ ფულზე არასდროს გაიყიდება.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და არჩევნების მეორე ტურსაც ბოიკოტი გამოუცხადეს, რომელიც 21 ნოემბერს ჩატარდა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მეოთხე რაუნდი 8 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ განაცხადეს, იყო საკითხები, რომლებზეც თანხვედრა მოხდა, თუმცა, დარჩა რამდენიმე პრინციპული თემა, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება.

მოსალოდნელია, რომ მოლაპარაკებების მეხუთე რაუნდი პარლამენტის პირველ სხდომამდე ერთი დღით ადრე, 10 დეკემბერს გაიმართება.