ელჩებთან მოლაპარაკების შემდეგ ევროპული საქართველოს ერთ-ერთი ლიდერის, დავით ბაქრაძის განცხადებით, ქართულ ოცნებასთან მოლაპარაკებისას გარკვეულ საკითხებთან დაკავშირებით არსებობს კომპრომისები.

"მოლაპარაკებაზე განიხილება 4 ძირითადი საკითხი. პირველი უკავშირდება რიგგარეშე არჩევნების დანიშვნას, მეორე არის პოლიტპატიმრების საკითხი, მესამე არის საარჩევნო სისტემის შესაძლო ცვლილებები და მეოთხე არის საარჩევნო კოდექსში ცვლილებები, რომელიც განაპირობებს საარჩევნო გარემოს შეცვლას. პირველ ორ საკითხზე არსებობს ფუნდამენტური სხვაობა პოზიციების მხარეებს შორის და აქ შეთანხმების რესურსი არ ჩანს. მესამე საკითხზე გარკვეული კომპრომისული წინადადებები იყო, მაგრამ შეთანხმებული არ არის, მაგრამ არის გარკვეული რესურსი, რომ საარჩევნო სისტემა შეიცვალოს. რაც შეეხება მეოთხე საკითხს, აქ არის გარკვეული, ტექნიკური შინაარსის დეტალები, სადაც შეთანხმება შესაძლებელია, მაგალითად, როგორ გაუმჯობესდეს უბნებზე ვითარება. არსებობს საკითხები, სადაც პოზიციებით შორს ვართ", — განაცხადა დავით ბაქრაძემ.

დასრულდა მოლაპარაკების მეოთხე რაუნდი ოპოზიციასა და ქართულ ოცნებას შორის. როგორც ბქარაძემ აღნიშნა, ევროპული საქართველო პარლამენტში შესვლას არ აპირებს და აგრძელებენ მოლაპარაკებებს.