ჩინეთი და ნეპალი მსოფლიოს ყველაზე მაღალი მწვერვალის ახალ სიმაღლეზე შეთანხმდნენ. როგორც აღმოჩნდა, ევერესტი თითქმის ერთი მეტრით უფრო მაღალია და ის 8 848,86 მეტრია.

ევერესტი ორი ქვეყნის საზღვარზე მდებარეობს. კატმანდუსა და პეკინში მწვერვალის სიმაღლეზე სხვადასხვა მოსაზრებები ჰქონდათ. საბოლოოდ, ორივე ქვეყანამ ევერესტზე გეოდეზისტების ექსპედიციები გაგზავნა და დიდი ხნის მუშაობის შემდეგ სიმაღლეზე შეთანხმდა.

"შეგვიძლია დარწმუნებული ვიყოთ, რომ ეს ევერესტის ყველაზე ზუსტი სიმაღლეა, რომელიც აქამდე გვქონია. ეს ჩვენი მხრიდან ძალიან დიდი პასუხისმგებლობა იყო. ჩვენთვის საამაყო მომენტია", — განაცხადა სუშილ დანგომლა, ნეპალის მხრიდან პროექტის ხელმძღვანელმა.

აქამდე ნეპალს ევერესტის სიმაღლე თავისით არასდროს განუსაზღვრავს. ქვეყანა ეყრდნობოდა 1954 წელს Survey of India-ს მიერ გაკეთებულ აზომვას, რომლის თანახმადაც ევერესტი 8 848 მეტრია. სწორედ ეს მონაცემები მიიჩნეოდა მწვერვალის ოფიციალურ სიმაღლედ.

2005 წელს ჩინეთის ექსპედიციამ დაადგინა, რომ მწვერვალის სიმაღლე 8 844,43 მეტრია, რაც ოფიციალურ მონაცემთან შედარებით თითქმის 3,7 მეტრით ნაკლები იყო.

ევერესტის სიმაღლის ერთობლივად გამოცხადებასთან დაკავშირებით ჩინეთსა და ნეპალს შორის 2019 წელს შეთანხმდნენ, როცა პრეზიდენტი სი ძინპინი კატმანდუში ოფიციალური ვიზიტით იმყოფებოდა.