ევროპული საქართველოს ერთ-ერთი ლიდერის, დავით ბაქრაძის თქმით, პოლიტიკოსები ვალდებულნი არიან მიმდინარე მოლაპარაკებების შესახებ საზოგადოებას ინფორმაცია მიაწოდონ. მისი თქმით, ამ წერტილამდე უკვე მივიდნენ, ამიტომ პირადად მისი ინიციატივით დღეს შეხვედრაზე დააყენებს საკითხს, რომ ყველაფერი გაასაჯაროვონ.

"თუ რაიმე აზიანებს მოლაპარაკებების პროცესს, ესაა ინფორმაციის დამალვა და ნაკუწ-ნაკუწ არასწორი ინფორმაციის და ინტერპრეტაციების გამოტანა. ამიტომ, ჩვენი პოზიცია არის პრინციპული, ეს არ გახლავთ სახელმწიფოთაშორისი მოლაპარაკება, ეს არის პოლიტიკური მოლაპარაკება და საზოგადოებას აქვს უფლება, ჩვენ პოლიტიკოსები კი ვალდებულნი ვართ რომ საზოგადოებას მივაწოდოთ ინფორმაციას რაზე მიდის ინფორმაცია", — განაცხადა მან.

დღეს ოპოზიციასა და მმართველ პარტიას შორის მოლაპარაკებების მეოთხე რაუნდი მიმდინარეობს. ვრცელდება ინფორმაცია რამდენიმე პარტიის პარლამენტში შესვლის შესახებაც, თუმცა ისინი ამას არ ადასტურებენ. მხარეები აშშ-ს ელჩის რეზიდენციაში უკვე მივიდნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

მესამე რაუნდი 7 დეკემბერს შედგა. ოპოზიციისა და მმართველი პარტიის წინადადებები მხარეებმა პუნქტებად განიხილეს. როგორც შეხვედრის დასრულების შემდეგ მათ განაცხადეს, იყო პუნქტები, რომლებზეც თანხვედრა მოხდა, თუმცა დარჩა რამდენიმე პრინციპული პუნქტი, რაზეც ჯერ ვერ შეთანხმდნენ. ამის ფონზე, ქართული ოცნების ლიდერები აცხადებენ, რომ მათი განწყობა პოზიტიურია და სჯერათ — მომავალ წელს პარლამენტში ყველა დეპუტატი იქნება.

ამავე თემაზე: