ამერიკის ელჩ, კელი დეგნანთან შეხვედრის შემდეგ სტრატეგია აღმაშენებლის ლიდერმა, გიორგი ვაშაძემ განაცხადა, რომ ყველა პარტია დამოუკიდებელ გადაწყვეტილებას მიიღებს.

"სტრატეგია აღმაშენებელი მივიღებთ გადაწყვეტილებას ჩვენი მრწამსიდან გამომდინარე, ჩვენი სახელმწიფო ინტერესებიდან გამომდინარე. არასდროს არცერთი პარტიის ტყვეობაში არ ვიქნებით. ყველა პარტია მიიღებს დამოუკიდებლად გადაწყვეტილებას. ჩვენ ერთი რამ ვიცით, რომ ოპოზიციური ერთობა არის ის მექანიზმი, რითიც შეგვიძლია, მნიშვნელოვანი ცვლილებები მოხდეს ქვეყანაში", — განაცხადა გიორგი ვაშაძემ.

ევროკავშირის ელჩი საქართველოში, კარლ ჰარცელი და აშშ-ის ელჩი, კელი დეგნანი, ოპოზიციისა და სახელისუფლებო გუნდის წარმომადგენლებთან ერთად შეხვედრებს მართავენ, რათა პოლიტიკური კონსენსუსი შედგეს და კრიზისი, რომელიც 31 ოქტომბრის არჩევნებს მოჰყვა, განიმუხტოს.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.