გირჩის ლიდერის, ზურაბ ჯაფარიძის თქმით, არის პუნქტები, რაზეც შეთანხმება შესაძლებელია, თუმცა არის რამდენიმე პრინციპული პუნქტი, რომელზეც ჯერჯერობით თანხვედრა ვერ ხერხდება. ამის შესახებ მან მოლაპარაკებების მესამე რაუნდის შემდეგ ისაუბრა.

"ჯერჯერობით არანაირი კონკრეტული შედეგი არ არის. პუნქტობრივად გავიარეთ ხელისუფლების მოტანილი წინადადება, ისევე როგორც ოპოზიციის მიერ შეთანხმებული ერთიანი წინადადებები. არის რაღაც პუნქტები, რაზეც თანხვედრა ვნახეთ, მაგრამ არის რაღაც პრინციპული პუნქტები, რომელზეც ჯერჯერობით შეთანხმება ვერ ხერხდება", — განაცხადა მან.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტი მიუღებელია. ამ ეტაპზე მოლაპარაკებების მესამე რაუნდის მოლოდინია.