გირჩის ერთ-ერთი ლიდერი, ვახტანგ მეგრელიშვილი ამბობს, გოგა ხაჩიძე დიდი ხანია პარტიის მართვაში არ ერევა და გაუკვირდა კიდეც, რომ დღეს ოფისში დაინახა.

მას შემდეგ, რაც ზურა ჯაფარიძემ განაცხადა, რომ გირჩი იყოფა, პარტიის თანადამფუძნებელი, გოგა ხაჩიძე ოფისში მივიდა. მან მხარდაჭერა ზურა ჯაფარიძეს გამოუცხადა და განაცხადა, რომ გირჩი იაგო ხვიჩიამ და ვახტანგ მეგრელიშვილმა უნდა დატოვონ.

მეგრელიშვილის თქმით, ხაჩიძის გამოჩენა იმის მიმანიშვნებელია, რომ არსებობს ისეთი რა, რაც მან არ იცის.

"ბუნებრივია, მისი აზრი საინტერესოა, მაგრამ გოგა დიდი ხანია არ ერევა პარტიის მართვაში საერთოდ. წლები. მე უბრალოდ გამიკვირდა, რომ დავინახე გოგო ხაჩიძე და ეს მანიშნებელია იმის, რომ ბევრი რამე არსებობს ისეთი, რაც მე არ ვიცი. ალბათ, ერთად უნდა გავარკვიოთ და გოგაც მგონი მაგას იძახდა", — განაცხადა მეგრელიშვილმა.

ამასთან, იგი გამოეხმაურა იაგო ხვიჩიას პოსტს ბავშვთა პორნოგრაფიის საქმეზე და თქვა, რომ ის მართალი იყო.

"იაგო იყო ასი პროცენტით მართალი და იმ ადამიანის დაჭერა არ შეიძლებოდა, ვისაც იაგო გამოესარჩლა, რაც არ უნდა ცუდი დამოკიდებულება იყოს იმ სიტყვების მიმართ, რომელიც შინაარსიც მათ არ ესმით. გირჩის პოლიტიკოსს არ შეიძლება, ჰქონდეს განსხვავებული პოზიცია იმ თემაზე, რაზეც იაგომ თავისი პოზიცია დააფიქსირა", — აღნიშნა მეგრელიშვილმა.