"ლელოს" თავმჯდომარემ მამუკა ხაზარაძემ ხვალინდელ დახურულ შეხვედრაზე ისაუბრა, რომელიც ელჩებთან გაიმართება.

მისი თქმით, მე-3 რაუნდისთვის ოპოზიციურ პარტიებს შორის არ შეცვლილა ხედვა და ისინი ქვეყნის, სახელმწიფოებრიობისა და მოსახლეობის კეთილდღეობისთვის ბრძოლას განაგრძობენ.

როგორც ხაზარაძე აცხადებს, დღეს ოპოზიციურ პარტიებს შორის გაიმართა შეხვედრა, რამაც კიდევ ერთხელ დაამტკიცა, რომ პრინციპულად არაფერი შეცვლილა და მათი ხედვა ისევ უცვლელია.

"ხვალ არის ელჩებთან შეხვედრა და იქ გაჟღერებული თემები აუცილებლად უნდა მივიდეთ მოსახლეობამდე. რადგან ეს მოლაპარაკება არ ემსახურება რომელიმე პარტიის ინტერესს, ეს მოლაპარაკებები დაიწყო იმისთვის, რომ ჩვენი ქვეყანა წინ წავიდეს. პრინციპულად მნიშვნელოვანია, რომ ქართველი ხალხი ახალ ეტაპზე გადავიდეს, რაც ჩვენი წინსვლის ფუნდამენტია. შესაბამისად ვთვლი, რომ დადგა დრო, ეს ყველაფერი ვუთხრათ ჩვენს ამომრჩეველს და ისინი იყვნენ ინფორმირებულები", — აცხადებს მამუკა ხაზარაძე.

"დღეს უკვე ხელისუფლებაც აღიარებს, რომ ოპოზიციურ სპექტრში არიან განსხვავებული იდეოლოგიის და ხედვის პარტიები და ყველა ერთი "კლასტერი" არ არის, თუმცა ფუნდამენტურ საკითხებზე ჩვენ ერთიანი სახელმწიფოებრივი ხედვები გვაქვს. “ლელოსაც” ამ პროცესში აქვს დამოუკიდებელი პოზიცია სხვადასხვა მიმართულებით, რომელიც არ ეხება ვადამდელ არჩევნებს ან ძირითად წითელ ხაზებს," — დაამატა მან.

მამუკა ხაზარაძის თქმით, არჩევნების გაყალბებამ და მოსახლეობის კეთილდღეობისთვის ბრძოლამ, ოპოზიციური პარტიები ერთ პლატფორმაზე დააყენა.