აჭარის მთავრობის თავმჯდომარე, თორნიკე რიჟვაძე ფიქრობს, რომ აქციების ცენტრმა ბათუმიდან თბილისში შემთხვევით არ გადაინაცვლა. მისი აზრით, ეს ექსპრეზიდენტ მიხეილ სააკაშვილის დავალებით ხდება, რადგან მან "ფავორიტი და საკმაოდ ოდიოზური პერსონა დესანტის სახით" გაგზავნა აჭარაში. რიჟვაძეს არ დაუკონკრეტებია, თუმცა აქამდე ნათქვამი განცხადებების მიხედვით, სავარაუდოა, რომ ის ლევან ვარშალომიძეს გულისხმობს.

"აჭარა არ იყო შემთხვევით არჩეული, ვინაიდან, დევნილმა და მსჯავრდებულმა პრეზიდენტმა, ასე ვთქვათ, მისი ფავორიტი და საკმაოდ ოდიოზური პერსონა დესანტის სახით გამოაგზავნა აჭარაში. თუმცა ის მოლოდინები რაც ქონდათ შიგნით, ასევე, ზოგადად, პოლიტიკური მოვლენებისგან იყო აბსოლუტურად აცდენილი და ყოველდღიურ რეჟიმში ჩვენ რასაც ვხედავთ ეს არის მართლა დამარცხებული, დაბოღმილი პოლიტიკური ძალის მოქმედებები", — განაცხადა რიჟვაძემ იმედის ეთერში.

აჭარის მთავრობის სახლთან რამდენიმე დღეა საპროტესტო აქციები იმართება, რომელზეც რიჟვაძეს "მონას" ეძახიან. დღეს აქციის მონაწილეებმა ბუშტები მიიტანეს, რომლებზეც "რიჟვაძე მონა" ეწერა. ბუშტები პოლიციამ დახეთქა, რასაც გამოხატვის თავისუფლების შეზღუდვად აფასებენ, რიჟვაძე კი ამტკიცებს, რომ ეს პერფორმანსი კომიკური და მეასეხარისხოვანი იყო.

ამ აქცია-პერფორმანსზე სამართალდამცავებმა დაუმორჩილებლობის ბრალდებით 2 პირი დააკავეს.