ევროპული საქართველოს ერთ-ერთი ლიდერი, გიგი უგულავა ამბობს, რომ მისი სასამართლო პროცესის განახლება მოსალოდნელი იყო. უგულავას თქმით, შესაძლოა დააკავონ ოპოზიციონერი ლიდერები და მათი "მძევლებად აყვანით" და დაშინებით ქართულმა ოცნებამ მოლაპარაკებები თავის სასარგებლოდ გადაწყვიტოს.

"მოსალოდნელი იყო, იმიტომ, რომ ქვეყანაში ყველა მიმართულებით ფორმდება დიქტატურა. ახლა ოპოზიციასთან მიდის დიალოგი პარლამენტში შესვლასთან, ან არშესვლასთან დაკავშირებით და პარალელურად ამ პროცესს იწყებ, ეს ნიშნავს, რომ გინდა მძევლები აიყვანო ან დააშინო, რომ იმ სხვა საკითხში მიიღო შენთვის სასარგებლო შედეგი.

შესაბამისად, აღმართავს ბარიერებს — ჯერ ერთს დაიჭერს, მერე მეორეს ... ვაგზლის "რაზვოდჩიკივით" იქცევა, სათითეებით რომ თამაშობენ. აი, ასეთი მენტალობის კაცია ივანიშვილი და ასე უყურებს ცხოვრებას, ასე უყურებს პოლიტიკას, მაგრამ, არ გამოვა. ცხოვრება გაცილებით უფრო რთული და კომპლექსურია, ვიდრე ვაგზლის "რაზვოდის" კეთება", — განაცხადა გიგი უგულავამ.

გიგი უგულავას სასამართლო პროცესი 10 დეკემბერს განახლდება.

ნაციონალური მოძრაობის ლიდერი, ნიკა მელიაც მმართველ პარტიასა და ოპოზიციას შორის მიმდინარე მოლაპარაკებებს უკავშირებს სასამართლო პროცესების განახლებას. მისი პროცესი 15 დეკემბერს განახლდება.

გარდა ამისა, თავდაცვის ყოფილმა მინისტრმა, ირაკლი ოქრუაშვილმა ფეისბუქზე დაწერა, რომ 14 დეკემბერს მისი პროცესი გაიმართება.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე, რომელიც 21 ნოემბერს ჩატარდა, და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი და ოპოზიცურ პარტიებს შორის მოლაპარაკებები მიმდინარეობს. უკვე გაიმართა მოლაპარაკებების ორი რაუნდი. ოპოზიცია ამბობს, რომ ქართულ ოცნებას წარუდგინეს კონკრეტული წინადადება და შემდეგ ნაბიჯს სწორედ მმართველი პარტიისგან ელიან.