ფიტნესცენტრ Reformerfitness-თან დააკავეს სპორტსმენი და ფიტნესცენტრის მომხმარებელი, რომელიც ობიექტის დალუქვას აპროტესტებდა.

შინაგან საქმეთა სამინისტროში On.ge-ს განუცხადეს, რომ მოქალაქე ადმინისტრაციული სამართალდარღვევათა კოდექსის 173-ე მუხლით დააკავეს, რაც პოლიციის კანონიერი მოთხოვნისადმი დაუმორჩილებლობას გულისხმობს. უწყებაში გვითხრეს, რომ დაკავებული უკვე გათავისუფლებულია.

Reformerfitness-ის ინვენტარის ამოღება და დალუქვა ამ წუთებში მიმდინარეობს. ფიტნესცენტრთან მოქალაქეები არიან შეკრებილნი და პოლიციის ქმედებებს აპროტესტებენ. ადგილზე მისულმა პოლიციამ Reformerfitnes-ის დირექტორ გიორგი ფუტკარაძეს ინვენტარის ამოღებისა და დალუქვის შესახებ ინფორმაცია მიაწოდა.

ფიტნესცენტრმა, Reformerfitness-მა აკრძალვების მიუხედავად ფუნქციონირება გააგრძელა, რის გამოც, გუშინ, 28 ნოემბერს დააჯარიმეს.

შრომის ინსპექტირების დეპარტამენტში განაცხადეს, რომ N322-ე დადგენილებით დამტკიცებული იზოლაციისა და კარანტინის წესების მოთხოვნების განმეორებით დარღვევაზე პასუხისმგებლობა გათვალისწინებულია საქართველოს სისხლის სამართლის კოდექსის 248-ე პრიმა მუხლის შესაბამისად.