საქართველოს სახალხო დამცველის აპარატის განცხადებით, ახალი რეგულაციების კონკრეტულ დღეებში მოხსნა, შესაძლოა, იყოს დისკრიმინაციული არადომინანტი რელიგიური გაერთიანებების მიმართ. ომბუდსმენი მოუწოდებს სახელმწიფოს რომ რეგულაციები მგავსად მიემართოს ყველა რელიგიურ გაერთიანებას.

"სახალხო დამცველი მიიჩნევს, რომ საქართველოს მთავრობის მიერ ახალ კორონავირუსთან დაკავშირებული რეგულაციები, რომელიც 2020 წლის 28 ნოემბრიდან 2021 წლის 31 იანვრის ჩათვლით, მათ შორის, 21:00 საათის შემდეგ გადაადგილების და საჯარო სივრცეში ყოფნის აკრძალვას გულისხმობს, შესაძლოა, არადომინანტი რელიგიური გაერთიანებების მიმართ დისკრიმინაციული იყოს. აღსანიშნავია, რომ მსგავსი შეზღუდვა არ გავრცელდება შობის — 6 იანვრის ღამეს, ამავე პერიოდში სხვა რელიგიური გაერთიანებების დღესასწაულები კი, რომლებიც, შესაძლოა, ასევე ღამის თევით აღინიშნებოდეს, მთავრობის მიერ გავრცელებულ განცხადებაში მოხსენიებული არ არი", — წერია სახალხო დამცველის განცხადებაში.

ომბუდსმენი განმარტავს, რომ რომელიმე რელიგიური გაერთიანებისთვის უპირატესობის დაუსაბუთებლად მინიჭებით, ბუნდოვანი რჩება სხვა გაერთიანებებისთვის ამავე უფლების ჩამორთმევის ლეგიტიმურობა

"მნიშვნელოვანია, სახელმწიფოს მიერ დაწესებული რეგულაციები მსგავსად მიემართებოდეს ყველა რელიგიურ გაერთიანებას, რათა მათ თანასწორ საფუძველზე შეძლონ რელიგიის თავისუფლების რეალიზება", — აცხადებენ უწყებაში.

მთავრობის მიერ დაწესებული ახალი შეზღუდვები მხოლოდ ორ შემთხვევაში იხსნება ახალი წლის ღამეს და შობის ღამეს, 6-7 იანვარს, როცა დღესასწაულს მართლმადიდებელი ეკლესია აღნიშნავს. იგივე პრივილეგია მთავრობას არ მიუნიჭებია სხვა რელიგიური კონფესიებისთვის.

ვიცე-პრემიერისა და ინფრასტრუქტურის მინისტრის, მაია ცქიტიშვილის თქმით, გამონაკლისი ამ თარიღებში იმის გამო დაიშვა, რომ ეს მოსახლეობის ძირითად ნაწილს ეხება. საკოორდინაციო საბჭოს სხდომის შემდეგ, ცქიტიშვილმა განმარტა, რომ სხვა კონფესიების შემთხვევაში, მათ დღესასწაულებზეც ისევე იმოქმედებს, როგორც გაზაფხულზე, ანუ მოთხოვნის შემთხვევაში საშვებს გასცემენ.

"მოგეხსენებათ, რომ არის გარკვეული, იგივე კათოლიკური საზოგადოებით დასახლებული რეგიონი, სადაც უკვე ადგილობრივ დონეზე ადგილობრივი საკოორდინაციო შტაბი მიიღებს ღონისძიებებს, რომელიც იმ რეგიონისთვის არის საჭირო. ეს არის ზედმეტი აჟიოტაჟი. შეიძლება, უფრო დაგვემატებინა მეტი კომუნიკაცია, მეტი ახსნა ამ საკითხში. თავიდანვე იყო გათვალისწინებული, რომ ეს სისტემა იმუშავებს ისე, როგორც გაზაფხულზე", — განაცხადა ცქიტიშვილმა.

საკოორდინაციო საბჭომ 28 ნოემბრიდან 31 იანვრის პერიოდში არაერთი შეზღუდვა დააწესა. მათ შორის, გადაადგილებაზე, მუნიციპალურ და საქალაქთაშორისო ტრანსპორტზე, რესტორნებსა და ბაზრობებზე. 24 დეკემბრიდან 2 იანვრის პერიოდში ხდება შეზღუდვების ნაწილობრივი შემსუბუქება: კერძოდ, ქვეყნის მასშტაბით, იმუშავებენ სავაჭრო ცენტრები, ღია და დახურული ბაზრობები და აღდგება როგორც მუნიციპალური, ისე საქალაქთაშორისო ტრანსპორტის მუშაობა. 3 იანვრიდან 15 იანვრის პერიოდში აღდგება ყველა ის შეზღუდვა, რომელიც 24 დეკემბრამდე მოქმედებდა. ამ პერიოდში ცხადდება უქმე, დასვენების დღეები. ხოლო 16 იანვრიდან აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).

ამავე თემაზე: