დემოკრატიის კვლევის ინსტიტუტში (DRI) აცხადებენ, რომ ე.წ. სამხრეთ ოსეთის დე-ფაქტო მთავრობამ ე.წ. ოჯახების გაერთიანების პროგრამა დაიწყო, რაც ადგილობრივი მოსახლეობის ცენტრალური ხელისუფლების მიერ კონტროლირებად ტერიტორიებზე მცხოვრებ ოჯახის წევრებთან გადასახლებასა და შესაბამისად, ახალგორში საკუთარი საცხოვრებლის სამუდამოდ დატოვებას გულისხმობს. DRI-ში მიაჩნიათ, რომ აღნიშნული პროგრამა ახალგორის ეთნიკურად ქართველი ადგილობრივი მოსახლეობისგან დაცლის "ლეგალური" გზაა.

"წასვლის მსურველმა ჯერ ყველა კომუნალური გადასახადი და ჯარიმა უნდა დაფაროს, რისი დამადასტურებელი დოკუმენტებიც ადგილობრივი უშიშროების სამსახურს წარედგინება. ამასთანავე, აუცილებელია, რომ მოიპოვოს დოკუმენტები, რომლითაც დადასტურდება, რომ მას ე.წ. საზღვრის მეორე მხარეს ოჯახი ნამდვილად ელოდება. ყველაზე მნიშვნელოვანი და სახიფათო ამ პროგრამაში "გასვლის დოკუმენტის" შინაარსია, რომლის თანახმადაც, რაიონიდან წამსვლელს უკან დაბრუნების შესაძლებლობა აღარ მიეცემა და საკუთრებაზე, რომელსაც ტოვებს, მომავალში პრეტენზიას არ განაცხადებს", — აცხადებენ არასამთავრობო ორგანიზაციაში.

DRI-ს ინფორმაციით, ამ დროისთვის ოჯახების გაერთიანების პროგრამის მსურველთა სიაში, დაახლოებით, 280 ადამიანია. ორგანიზაციაში ამბობენ, რომ ახალგორისთვის, რომელიც 2008 წლიდან დღემდე მოსახლეობის დიდმა ნაწილმა დატოვა, ეს რიცხვი საგანგაშოა. DRI-ში რუსეთის ფედერაციისა და ადგილობრივი დე ფაქტო ხელისუფლების მიერ წლების განმავლობაში განხორციელებულ პოლიტიკას აფასებენ, როგორც ჩუმ ეთნიკურ წმენდას.

  • დემოკრატიის კვლევის ინსტიტუტი საქართველოს ხელისუფლებას მოუწოდებს: ახალგორში შექმნილი უმძიმესი ჰუმანიტარული კრიზისის შესახებ საერთაშორისო საზოგადოების ინფორმირებისათვის ყველა ხელმისაწვდომი მექანიზმი გამოიყენოს;
  • მიიღოს ყველა შესაძლო ზომა ახალგორში დარჩენილი ადგილობრივი მოსახლეობის მდგომარეობის შესამსუბუქებლად.