აზერბაიჯანის პარლამენტის სთავაზობს მთავრობს, მიმართოს ეუთოს, რომ საფრანგეთი მინსკის ჯგუფის თანათავმჯდომარეობიდან გაიწვიოს. პარლამენტმა განცხადება საფრანგეთის სენატის რეზოლუციის საპასუხოდ მიიღო, რომელიც მთავრობას მოუწოდებს, მთიანი ყარაბაღის დამოუკიდებლობა აღიაროს.

"მილი მეჯლისი მოუწოდებს აზერბაიჯანის მთავრობას მიმართოს ეუთოს ხელმძღვანელობას მინსკის ჯგუფიდან საფრანგეთის გაწვევასთან დაკავშირებით, რომელმაც ბოლო დღეებში თავისი პოზიციებითა და განცხადებებით თავისი ნეიტრალურობა კითხვის ნიშნის ქვეშ დააყენა", — აცხადებენ დეპუტატები.

გარდა ამისა, განცხადებაში აღნიშნულია, რომ "გადაიხედოს პოლიტიკური ურთიერთობები აზერბაიჯანსა და საფრანგეთს შორის", ასევე, "ღრმად გაანალიზდეს ეკონომიკური კავშირები ორ ქვეყანას შორის და მიღებულ იქნას შესაბამისი ზომები".

25 ნოემბერს საფრანგეთის სენატმა 305 ხმით 1-ის წინააღმდეგ მიიღო რეზოლუცია, რომელიც საფრანგეთის მთავრობის მიერ მთიანი ყარაბაღის დამოუკიდებლობის აღიარებას ითვალისწინებს.

რეზოლუცია სარეკომენდაციო ხასიათისაა და ეს იმას არ ნიშნავს, რომ აღმასრულებელი ხელისუფლება მას დაამტკიცებს, მაგრამ მედიის ცნობით, რეზოლუციის მიღება სომეხი ხალხის მიმართ ერთგვარი სოლიდარობის ჟესტია. რეზოლუციაში, ასევე, დაგმობილია აზერბაიჯანის სამხედრო აგრესია, რომელიც თურქეთის მხარდაჭერითა და უცხოელი დაქირავებული მებრძოლების მეშვეობით განხორციელდა. მთიანი ყარაბაღის დამოუკიდებლობას არცერთი ქვეყანა, მათ შორის არც სომხეთი ცნობს.

9 ნოემბერს გვიან ღამით სომხეთსა და აზერბაიჯანს შორის მიღწეული შეთანხმების თანახმად, ყარაბაღის გარშემო მდებარე რაიონები უახლოეს მომავალში აზერბაიჯანს გადაეცემა.

მთიან ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიევმა და რუსეთის პრეზიდენტმა ვლადიმერ პუტინმა მოაწერეს ხელი. შეთანხმების თანახმად, სომხური მხარე აზერბაიჯანს კონფლიქტის ზონაში რამდენიმე ტერიტორიას გადასცემს, მთიან ყარაბაღში ბრუნდებიან დევნილები, კონფლიქტის ხაზის გასწვრივ კი რუსი სამშვიდობოები განლაგდებიან. რა სტატუსი ექნება მთიანი ყარაბაღის რეგიონს, შეთანხმებაში არ წერია.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან. მან შეთანხმებას ისტორიული უწოდა და აღნიშნა, რომ ეს სომხეთის კაპიტულაციას ნიშნავს.

ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს. მთიან ყარაბაღში სამხედრო დაპირისპირება 27 სექტემბერს განახლდა.

ამავე თემაზე: