ჯანდაცვის მინისტრის, ეკატერინე ტიკარაძის განცხადებით, რესპუბლიკურ საავადმყოფოს მომავალ ორ კვირაში 350 საწოლი დაემატება და ყველაზე მძიმე პაციენტებს მიიღებს.

"რესპუბლიკურ საავადმყოფოში ვგეგმავთ დავამატოთ 350 საწოლი, რომელიც იქნება როგორც ინტენსიური საწოლი აღჭურვილი და შესაბამისად, ჩვენ მივიღებთ ყველაზე მძიმე პაციენტებს. აქაც სახელმწიფო აიღებს ყველაზე მძიმე ტვირთს რთული პაციენტების მართვის კომპონენტში. ასევე, მიმდინარეობს პროცესი ინფექციური საავადმყოფოს რეაბილიტაციის კუთხით. იქაც გვაქვს რესურსი, რომ გავზარდოთ საწოლფონდი დამატებით 200 პაციენტისთვის", — განაცხადა ეკატერინე ტიკარაძემ.

საქართველოს ჯანდაცვის მინისტრის, ეკატერინე ტიკარაძის თქმით, საქართველოში 7 000-მდე საწოლია მობილიზებული. ოქტომბერში კი დაახლოებით, 3 300 იყო.

"პირველი გამოსავალი, რასაც მთავრობას ხშირად გვსაყვედურობენ, არის, რამდენად დროულად და სწრაფად მოხდა საწოლფონდის მობილიზება. მე შეგახსენებთ, რომ მაშინ, როცა ჯანდაცვის სამინისტრომ დააფიქსირა, თუ რა შედეგები შეიძლებოდა მოყოლოდა ქუჩაში გამართულ აქციებს, ჩვენ მოვაბილიზეთ დამატებითი საწოლფონდი. თუ ჩვენ ოქტომბრის თვეში გვქონდა მობილიზებული მხოლოდ 3 300 საწოლი, დღეის მდგომარეობით, ჩვენ უკვე გვაქვს 7 000 საწოლამდე მობილიზებული", — განაცხადა ტიკარაძემ.