ჯანდაცვის მინისტრის, ეკატერინე ტიკარაძის თქმით, მობილიზებული საწოლფონდით შეიძლება მოსახლეობით ორჯერ დიდ ქვეყანას გაეწიოს მომსახურება. ამის შესახებ მან იმედის ეთერში ისაუბრა.

გარდა ამისა, ჯანდაცვის მინისტრმა აღნიშნა, რომ საველე ჰოსპიტლების გამოყენებას არ განიხილავენ.

"ჩვენ გავაკეთეთ არაერთი ანალიზი იმის შესახებ, თუ რა კატეგორიის პაციენტები არიან დღესდღეობით საქართაველოს კლინიკებში განთავსებული. ასევე, ჩვენ გავაკეთეთ არაერთი ანალიზი იმასთან დაკავშირებით თუ რამდენად სწორად გვაქვს დაგეგმილი საქართველოში საწოლფონდის მობილიზაცია მისი ხარისხობრივი პროპორციით და შეიძლება ითქვას, რომ საქართველოში დღეს მობილიზებული საწოლფონდით, შეიძლება მომსახურება გაეწიოს საქართველოს მოსახლეობის რაოდენობაზე ორჯერ დიდ ქვეყანას. აქედან გამომდინარე მნიშვნელოვანი არის ისევ და ისევ საწოლფონდის სწორად მართვა", — განაცხადა ტიკარაძემ.

23 ნოემბერს საქართველოში კორონავირუსის 3 958 ახალი შემთხვევა დადასტურდა, გამოჯანმრთელდა — 3 531, გარდაიცვალა — 36.

ქვეყანაში პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 108 690-ს. ჯამში გამოჯანმრთელებულთა რაოდენობა გაიზარდა 89 170-მდე. 2020 წლის 26 თებერვლიდან დღემდე სულ გვაქვს 1 012 გარდაცვალების შემთხვევა.