მთავრობის ეკონომიკური გუნდი დღეს რესტორნების წარმომადგენლებს შეხვდა. რესტორატორთა ასოციაციის ხელმძღვანელი, შოთა ბურჯანაძე ამბობს, რომ ადმინისტრაციაში მათ სხვადასხვა სახის შეზღუდვა განიხილეს, რომელიც შეიძლება სარესტორნო სფეროს დაუწესდეს. როგორც მან TV პირველის ეთერში თქვა, ნებისმიერი ახალი შეზღუდვა რესტორნებისთვის დამღუპველი იქნება.

შოთა ბურჯანაძის თქმით, რესტორნების ამ რეჟიმში მუშაობას მინისტრები ეპიდემიის გავრცელების ხელშემწყობად განიხილავენ. თუმცა, როგორც ის ამბობს, დღესდღეობით რესტორნები იმდენად ცარიელია, რომ ვირუსის გავრცელებას შეიძლება სხვა სფეროები უწყობდნენ ხელს, მაგალითად საავადმყოფოები ან საზოგადოებრივი ტრანსპორტი, სადაც დიდი რაოდენობის ხალხი იყრის თავს.

მისივე თქმით, სამუშაო შეხვედრაზე განიხილეს ისეთი შეზღუდვები, რომელიც ევროპის ქვეყნებში გამოიყენება, მაგალითად შაბათ-კვირის მუშაობის შეჩერება ან სამუშაო საათების შეზღუდვა,

"მაგრამ სფეროს მხრიდან მინდა ვთქვა, რომ ეს შეზღუდვები იმდენად წითელ ხაზს არის გადაცილებული და ბევრი რესტორანი წაგებაზე მუშაობს იმიტომ, რომ უფრო მეტი გადასახადი ექნება არმუშაობის შემთხვევაში, ეს იქნება იჯარა თუ საბანკო ვალდებულებები [...] ჩემგან ჩამოთვლილი ნებისმიერი შეზღუდვა რესტორნისთვის ნიშნავს "ლოქდაუნს", — განაცხადა შოთა ბურჯანაძე.

ასოციაციის ხელმძღვანელი აღნიშნავს, რომ თვითონ "ლოქდაუნი" გამოცხადება შეიძლება რესტორნის ხელმძღვანელებისთვის გარკვეული პერიოდით შეღავათი იყოს, თუმცა დასაქმებულები შემოსავალს დაკარგავენ და უკიდურეს მდგომარეობამდე მივლენ.