პარტია გირჩის ლიდერის, ზურაბ ჯაფარიძის განცხადებით, ოპოზიციურმა პარტიებმა ამერიკის სახელმწიფო დეპარტამენტის ევრაზიისა და ევროპის განყოფილების ხელმძღვანელის, ფილიპ რიკერისგან მიიღეს შემოთავაზება ინსტიტუტების ჩართულობასთან დაკავშირებით, მაგრამ ჯაფარიძის თქმით, ქვეყანაში ეს ინსტიტუტები "არ არსებობს", ამიტომ ეს ბრძოლა "უშინაარსოა".

"პირდაპირი მოწოდება არ ყოფილა, თუმცა შემოთავაზებული იყო ის, რომ ხომ არ ჯობია ინსტიტუტების გამოყენებით სცადოთ გაგრძელება ბრძოლის? რაზეც ჩვენ ავუხსენით, რომ ამ ქვეყანაში ინსტიტუტები არ არსებობს, შესაბამისად, ის, რაც შეიძლება მუშაობდეს რომელიმე განვითარებულ ქვეყანაში, მაგალითად, სასამართლო, საარჩევნი კომისია, საქართველოში არ არსებობს. ამიტომ ეს ბრძოლა უშინააროსა, თავს ხომ არ მოვიტყუებთ?", — აღნიშნა ჯაფარიძემ.

დღეს ოპოზიციის ლიდერები ამერიკის სახელმწიფო დეპარტამენტის ევრაზიისა და ევროპის განყოფილების ხელმძღვანელს, ფილიპ რიკერს შეხვდნენ. როგორც დეპარტამენტში გამართულ პრესკონფერენციაზე განაცხადეს ამერიკის სახელმწიფო მდივანმა, მაიკ პომპეომ ოპოზიციურ პარტიებთან და არასამთავრობოებთან შესახვედრად მისი წარმომადგენელი დატოვა.

პომპეო თბილისში გუშინ, 17 ნოემბერს საღამოს ჩამოფრინდა და ოფიციალური შეხვედრები დღეს დაიწყო. ის თბილისში 24 საათზე ნაკლები იყო და უკვე წავიდა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიასა და პატრიარქ ილია მეორეს, თუმცა მედიასთან კომენტარები არ გაუკეთებია და მხოლოდ აშშ-ის საელჩოს განცხადებები გავრცელდა. ასევე, პომპეო შეხვდა არასამთავრობო ორგანიზაციებს. ცნობილია, რომ NGO-ებთან საუბრის ძირითადი თემა სასამართლოს დამოუკიდებლობა იყო.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე: