ქართული ოცნების სიის მე-4 ნომერი და იუსტიციის ყოფილი მინისტრი, თეა წულუკიანი აცხადებს, რომ ოპოზიციის დღევანდელი ლიდერი, მიხეილ სააკაშვილი და მის მიერ მართული ზოგიერთი ძალები საქართველოში მთავარ ანტიდასავლურ ძალად რჩებიან. წულუკიანის თქმით, ამის ნათელი დადასტურებაა, "მიხეილ სააკაშვილის ტრადიციად ქცეული ანტიდასავლური, არა მხოლოდ პოლიტიკური ქცევა და კულტურა, არამედ ანტიდასავლური რიტორიკა".

"მაგალითისთვის გუშინ სააკაშვილმა საჯაროდ განაცხადა და სწორედ ამიტომ ვართ დღეს შეშფოთებულები, რომ ევროსაბჭოს სადამკვირვებლო მისიის ხელმძღვანელი, ბატონი კოქსი არის რუსეთის აგენტი. ვციტირებ. "ის არის რუსეთის კმაყოფაზე მყოფი", ხოლო საპარლამენტო ასამბლეის დადებითი დასკვნა 31 ოქტომბრის არჩევნებზე რუსეთის უშიშროების ფედერალური სამსახურის ტოლფას დასკვნად გამოაცხადა", — ამბობს წულუკიანი.

მისი შეფასებით, სააკაშვილის თავდასხმა ერთ-ერთ უმნიშვნელოვანეს საერთაშორისო ინსტიტუტზე გამოიწვია, ალბათ, იმან, რომ ამ ინსტიტუტის დასკვნა უბრალოდ არ დაემთხვა მის მიერ ტირაჟირებულ ყალბ რეალობას, იმასთან დაკავშირებით, რომ თითქოს მან გაიმარჯვა არჩევნებში და არა ქართულმა ოცნებამ.

ეუთო/ოდირის, ევროპის საბჭოსა და ნატოს საპარლამენტო ასამბლეათა საერთაშორისო დამკვირვებლების წინასწარი მიგნებებისა და დასკვნების შესახებ ერთობლივი მოხსენების თანახმად, არჩევნები კონკურენტულ გარემოში ჩატარდა და საერთო ჯამში, ფუნდამენტური თავისუფლებები დაცული იყო.

NDI-ს მიხედვით, საარჩევნო ოქმებში არსებულმა სავარაუდო უზუსტობებმა, ფართოდ გავრცელებულმა ცნობებმა საარჩევნო უბნებზე ან მის გარეთ დამაშინებელი ქცევის შესახებ, შედეგების დაგვიანებულმა გამოქვეყნებამ და წინასაარჩევნო პერიოდში ძალაუფლების ბოროტად გამოყენების განცდამ 31 ოქტომბრის საპარლამენტო არჩევნების წინ კანონმდებლობისა და ადმინისტრაციული პროცედურების გაუმჯობესების კუთხით მიღწეული წინსვლა გადაფარა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

IRI-ს სრული ანგარიში შეგიძლიათ ნახოთ აქ.