ბათუმში ნაციონალური მოძრაობის შტაბს ქვები ესროლეს და მინები ჩაამტვრიეს. როგორც პარტიის ერთ-ერთი ლიდერი, მირდატ ქამადაძე ამბობს, ეს მოხდა მაშინ, როცა ენმ-ის ყველა წარმომადგენელი აქციაზე იმყოფებოდა.

"ეს კიდევ ერთხელ მიანიშნებს იმაზე, თუ რა მეთოდებით აპირებს ქართული ოცნება ოპოზიციასთან ურთიერთობას. დღეს, მოგეხსენებათ, ნიკა მელიას ოფისზე მოხდა თავდასხმა. ეტყობა, ერთობლივი შეტევა დაიწყეს მთავარ ოპოზიციურ ძალაზე", — განაცხადა მირდატ ქამადაძემ.

შსს-ს ინფორმაციით, საქმეზე გამოძიება საქართველოს სისხლის სამართლის კოდექსის 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.

ერთიანი ნაციონალური მოძრაობის ინფორმაციით, გლდანში ნიკა მელიას შტაბზეც თავდასხმა მოხდა. როგორც On.ge-ს მელიას შტაბის წევრმა განუცხადა, ოფისს ქვები და, სავარაუდოდ, ე.წ მოლოტოვის კოქტეილები ესროლეს. დამწვარია ოფისის ავეჯი.

შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 187-ე მუხლით მიმდინარეობს, რაც გულისხმობს ნივთის დაზიანებას ან განადგურებას.