შრომის, ჯანმრთელობისა და სოციალური დაცვის მინისტრის განცხადებით, საყოველთაო ჯანდაცვის პროგრამის ფარგლებში 10-მდე კლინიკასთან თანამშრომლობა შეწყდება. სერგეენკოს თქმით, პრობლემები არის სამინისტროს გადახდილი ფული არამიზნობრივად იხარჯება და ძირითადად მენეჯმენტისკენაა მიმართული. მისივე თქმით, პრობლემები იკვეთება ხარისხთან დაკავშირებითაც:

"იკვეთება კლინიკები, რომელთაც, ანალიზის შედეგად დავინახეთ, რომ ჩვენს მიერ გადახდილი თანხები უდიდესი ნაწილი მიემართება ე.წ. არაპირდაპირი ხარჯებისკენ, რაც არის მენეჯმენტის და მმართველების მოგება და მინიმალური ნაწილი მიემართება პაციენტის მოვლისაკენ, იმ ექიმების, ექთნების და იმ პერსონალის ანაზღაურებისაკენ, ვინც უშუალოდ უვლის პაციენტს. რა თქმა უნდა, ჩვენ ვერ ვიქნებით მომართული იმისკენ, რომ ასეთ კლინიკებთან გავაგრძელოთ თანამშრომლობა."

სერგეენკო კონკრეტულ კლინიკებს არ ასახელებს. მისივე თქმით, საყოველთაო ჯანდაცვის რეფორმის ახალი ტალღის შემუშავებას 1 წელზე მეტი დასჭირდა და ახლა ის ხარისხისა და ფასის დარეგულირებას ითვალისწინებს:

"პირველ ეტაპზე ასეთი კლინიკების რაოდენობა ბევრი არ იქნება, მაქსიმუმ 10, მცირე კალიბრის კლინიკები. მათი მონაცემები საჯარო გახდება იმ შემთხვევაში, თუ ისინი თვითონ გამოთქვამენ ამის სურვილს. ის 3 მთავარი საყრდენი, რაც არის მიწვდომადობა, ფასი და ხარისხი პირველ ეტაპზე ძალიან წარმატებით შესრულდა ერთ ფაქტორზე ზემოქმედებით - მიწვდომადობაზე. თუ არ ვიმოქმედეთ დანარჩენ ორზე, ხარისხზე და ფასზე რეფორმა აღმოჩნდება ცალმხრივი. ეს ყველაზე უფრო რთული გასატარებელი რეფორმაა, ამიტომ წელიწადზე მეტი დასჭირდა მის მომზადებას."