დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი, ხათუნა ზახაშვილი პირბადის სახეობებსა და მათი ეფექტიანად გამოყენების წესებს განმარტავს.

ზახაშვილის თქმით, რესპირატორები ყველაზე უკეთ გვიცავს, თუმცა, NCDC-ის წარმომადგენელი ასევე აღნიშნავს, რომ უმჯობესია ისინი სამედიცინო პერსონალს დავუთმოთ და ჩვენ ჩვეულებრივი, სამედიცინო ან მრავალჯერადი პირბადეები გამოვიყენოთ.

"თხოვნაა ასეთი, რომ რესპირატორების ხმარებით ნუ შეიწუხებთ თავს და ნურც წაართმევთ ამ შესაძლებლობას სამედიცინო პერსონალს. დაუთმეთ რესპირატორი მათ, თქვენ უნდა გამოიყენოთ, მეც მათ შორის, ჩვეულებრივი სამედიცინო ნიღაბი ან ჩვეულებრივი საზოგადოებრივი ნიღაბი, მრავალჯერადი მოხმარების", — აცხადებს ზახაშვილი.

მისი განმარტებით, ერთჯერადი სამედიცინო ნიღბის გამოყენება მხოლოდ მაშინაა ეფექტიანი, თუ იგი ერთდროულად ფარავს ცხვირს, პირს და ნიკაპს.

"ნიღაბი ერთდროულად უნდა ფარავდეს ცხვირს, პირს და ჩადიოდეს ნიკაპის ქვემოთ; ნიღაბი საკმაოდ მჭიდროდ უნდა იყოს სახეზე მორგებული, რისთვისაც სამედიცინო ნიღბებს აქვს ზედა ნაწილში მეტალის ფირფიტა, რომლითაც ვირგებთ ცხვირზე მჭიდროდ და ვცდილობთ, რომ სახეზე მჭიდროდ მოერგოს ნიღბის დანარჩენი ნაწილი. ნიკაპს ქვემოთ ამოტარებული ნიღაბი გვაძლევს იმის გარანტიას, რომ ის არ აცურდება და არ შექმნის საფრთხეს, რომ პირს არ გვიფარავდეს", — ამბობს ზახაშვილი.

რაც შეეხება მრავალჯერად ნიღბებს, ზახაშვილის თქმით, მის ეფექტიანობას შრეების რაოდენობა განსაზღვრავს.

"მიაქციეთ ყურადღება, რომ ის არ იყოს ერთშრიანი, ორშრიანი, არამედ, რამდენიმე შრისგან შედგებოდეს. იყოს საკმაოდ მჭიდრო ნაჭრისგან დამზადებული და რაც მთავარია, ხშირად უნდა ირეცხებოდეს და უთავდებოდეს", — აცხადებს ხათუნა ხაზაშვილი.

გადამდებ დაავადებათა დეპარტამენტის ხელმძღვანელი ეხმაურება საზოგადოებაში გავრცელებულ მოსაზრებას იმის შესახებ, რომ ჯანმრთელ ადამიანებს სამედიცინო ნიღბის ფერადი მხარე სახისკენ უნდა ჰქონდეთ მიმართული, ხოლო თეთრი გარეთ მოიქციონ. ხათუნა ზახაშვილის განცხადებით, ეს აბსოლუტურად არასწორი მიდგომაა და სამედიცინო ნიღაბი ყველა ადამიანმა ერთნაირად უნდა ატაროს — ფერადი ნაწილი გარეთ, ხოლო შედარებით ღია ან თეთრი — სახისკენ.

"ეს ფერადი ნაწილი ისეთი მასალისგანაა დამზადებული, რომ ხელს უწყობს წვეთების არეკლვას და შესაბამისად, თუ თქვენკენ მოემართება, ასე ვთქვათ, ინფიცირებული წვეთები მეორე ადამიანის მიერ მათი გამოფრქვევისას, ეს შრე მაქსიმალურად შეეცდება შეაკავოს მათი მოხვედრა თქვენს სასუნთქ სისტემაში. ის თეთრი ნაწილი, რომელიც შიგნით არის მოქცეული, არის უფრო შემწოვი შრე, რომელსაც გააჩნია უნარი, ჩვენი საუბრისას გამოტყორცნილი წვეთები მაქსიმალურად შეაკავოს. იმ შემთხვევაშიც კი, თუ ჩვენ ვართ შესაძლოდ ინფიცირებული და ჯერ არ ვიცით ამის შესახებ, ეს შრე ხელს შეუწყობს იმას, რომ ჩვენ გარშემო რაც შეიძლება ნაკლებად გავავრცელოთ ვირუსის შემცველი ნაწილაკები.

ასე რომ, ნიღაბი უნდა ვიხმაროთ სწორად და ნიღაბი უნდა ვიხმაროთ ყველგან, სადაც შეიძლება შევუქმნათ რისკი სხვა ადამიანებს, ან შეგვექმნას რისკი ჩვენ თვითონ", — აცხადებს ხათუნა ზახაშვილი.

13 ნოემბრის მონაცემებით, საქართველოში კორონავირუსის 73 154 შემთხვევაა დაფიქსირებული, მათ შორის, გამჯანმრთელდა 55 511 ადამიანი, ხოლო, გარდაიცვალა — 636.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: