უკრაინის პრეზიდენტი, ვოლოდიმირ ზელენსკი, რომელსაც კორონავირუსი აქვს, დღეს საავადმყოფოში გადავიდა. ამის შესახებ ინფორმაციას Independet ავრცელებს. პრეზიდენტის პრესსამსახურის ცნობით, "თავდაპირველად ის [სამკურნალოდ] სახლში წავიდა, შემდეგ კი საავადმყოფოში გადასვლა გადაწყვიტა".

ორშაბათს ზელენსკიმ საკუთარ ტვიტერზე დაწერა, რომ არ არსებობს იღბლიანი ხალხი, ვისთვისაც ვირუსი საფრთხეს არ წარმოადგენს. ის აღნიშნავდა იმასაც, რომ თავს კარგად გრძნობდა.

"არ არსებობს იღბლიანი ხალხი, რომლისთვისაც კოვიდ-19 საფრთხეს არ წარმოადგენს. საკარანტინე ზომების მიუხედავად, ტესტზე დადებითი პასუხი მივიღე. თავს კარგად ვგრძნობ, ბევრ ვიტამინს ვიღებ. თვითიზოლაციის პირობას ვდებ, მაგრამ გავაგრძელებ მუშაობას. მე გადავლახავ კოვიდ-19-ს, როგორც ადამიანების უმეტესობამ გააკეთა. ყველაფერი კარგად იქნება", — წერია ზელენსკის პოსტში.

დღევანდელი მონაცემებით, უკრაინაში კორონავირუსის 500 865 შემთხვევაა დადასტურებული, მათ შორის, გარდაცვლილია — 9 145, გამოჯანმრთელდა — 227 694.