ნაციონალური მოძრაობის წევრი, სალომე სამადაშვილი ამბობს, რომ პარტიის თავმჯდომარის, გრიგოლ ვაშაძის ინტერვიუ რუსთავი 2-თან "სუფთა ჰაერის ჩასუნთქვა" იყო. ამის შესახებ მან ფეისბუქზე დაწერა.

"როგორი სასიამოვნოა, როდესაც უსმენ ადამიანს და ხვდები, რომ ვიღაცას კიდევ შეუძლია სახელმწიფოებრივად აზროვნება, ზოგადად აზროვნება და ორი საწინააღმდეგო აზრის ერთდროულად განთავსება საკუთარ გონებაში. საოცარი ინტელექტუალური სიღატაკით გამორჩეული პოლიტიკური დისკურსის ფონზე ჩვენს გარშემო, გრიგოლ ვაშაძის დღევანდელი ინტერვიუ, ნამდვილად სუფთა ჰაერის ჩასუნთქვა იყო", — წერს სამადაშვილი.

გრიგოლ ვაშაძის ინტერვიუ რუსთავი 2-ის ეთერში 11 ნოემბერს გავიდა. როგორც მან აღნიშნა, მმართველ გუნდთან ოპოზიციის "თითქმის მომზადებული" მოლაპარაკებები ჩაიშალა. ასე უპასუხა მან კითხვას, რითი იყო განპირობებული მისი განცხადება, რამაც ორაზროვნება გამოიწვია. მან არ დაასახელა დიპლომატები, რომლებიც ჩართული იყვნენ მოლაპარაკებებში და აღნიშნა, რომ ამის ნებართვა არ აქვს.

მისივე თქმით, დაპირისპირებულმა პოლიტიკურმა მხარეებმა ერთმანეთთან ლაპარაკი უნდა ისწავლონ და აღარ უნდა "მირბოდნენ" დიპლომატებთან შუამავლობისთვის. გარდა ამისა, იგი ამბობს, რომ 10 ნოემბრის განცხადების შინაარსი არავისთან შეუთანხმებია და დარწმუნებულია, რომ სწორად მოიქცა.

მოლაპარაკებებთან დაკავშირებით ვაშაძის განცხადება ოპოზიციის სხვა წარმომადგენლებში კითხვები გააჩინა. ევროპული საქართველოს ლიდერი, სერგი კაპანაძე ამბობს, რომ არ იცის, რა მოლაპარაკებებზეა საუბარი. სტრატეგია აღმაშენებლის ლიდერი, გიორგი ვაშაძეც აღნიშნავს, რომ ინფორმაციას არ ფლობს.