პარტია გირჩის ლიდერის, ზურაბ ჯაფარიძის განცხადებით, მუსიკოსის, მიხაილო თოდუას ციხეში დაბრუნების მოთხოვნა "ცალსახად პოლიტიკური" ამბავია. მისი თქმით, მუსიკოსის ციხეში შებრუნება, სწორედ გირჩის ღონისძიების ჩატარების შემდეგ გადაწყვიტეს.

"სამ ღონისძიებაზეა საუბარი, თუმცა ორი ღონისძიება მანამდე იყო და გაართულეს საქმე, მისი ციხეში შებრუნება გადაწყვიტეს ჩვენი ღონისძიების ჩატარების შემდეგ, სადაც მიხაილო უკრავდა. ცალსახად მგონია, რომ ეს არის პოლიტიკური ამბავი. ეს იყო გირჩის წინასაარჩევნო კამპანია, როდესაც ჩვენ სხვადასხვა ღონისძიებას ვაწყობდით და ვერ გავაგებინეთ ამ ხალხს, რომ პოლიტიკური ღონისძიებები შეიძლება იყოს სხვადასხვა ფორმის. მათ წარმოუდგენიათ, რომ პოლიტიკური ღონისძიება უნდა იყოს მაინცდამაინც ძალით და ფულით მორეკილი ხალხი, რომლებსაც ლიდერები რაღაც სფიჩებით მიმართავენ. ჩვენ გვქონდა სხვადასხვა ტიპის შეხვედრა, მათ შორის, ბარებში, ისევე როგორც, გვქონდა მუსიკალური ღონისძიებები და ერთ-ერთ ასეთ ღონისძიებაზე მიხაილო უკრავდა", — განაცხადა ჯაფარიძემ ფორმულას ეთერში.

პრობაციის სამსახური მუსიკოს მიხაილო თოდუას ციხეში დაბრუნებას მოითხოვს. როგორც მუსიკოსმა On.ge-ს უთხრა, პრობაციის სამსახურს სურს, რომ საპატიმროში სასჯელის დარჩენილი ვადით, წელიწადითა და ათი თვით დაბრუნდეს. თბილისის საქალაქო სასამართლოში პროცესი 11 ნოემბერს, 14:00 საათზე გაიმართება. მიხაილო თოდუას თქმით, მას საპატიოდ 13-14 და 17 ოქტომბრის ღონისძიებები არ ჩაუთვალეს — 17 ოქტომბერს მან გირჩის პარტიულ ღონისძიებაზე, ღამის ათი საათის შემდეგ დაუკრა.