ტიტისა და მაგნოლიის ხეების გადატანის შემდეგ, ბიძინა ივანიშვილი თავის ბაღში ფიჭვის გადატანასაც გეგმავს. თუმცა მისი ბაღი სრულყოფილი ვერ იქნება, თუ ის უნიკალურ ხეებს გამოტოვებს. თუ ბატონ ბიძინას იდეები შემოელევა, მე მზად ვარ მას 8 საუკეთესო ხე ვურჩიო, რომელიც დღესვე უნდა გადარგოს თავის კარ-მიდამოში.

1. გრუტი

ფოტო: Marvel

გრუტის ამოძირკვა ბიძინა ივანიშვილს Planet X-ზე შეუძლია, იქ სადაც სხვა Flora colossus-ები ხარობენ. მართალია, აქ ჩამოტანისთვის მას ჰაბლის ტელესკოპისა და საერთაშორისო კოსმოსური ხომალდების რამდენიმე საათით შეჩერება მოუწევს, მაგრამ სადაც ჩვენმა მზარდმა ეკონომიკამ აიტანა რკინიგზის 3 საათით გაჩერება, იქ ილონ მასკი და ნასაც მოითმენენ ცოტა ხანს.

გრუტი ერთ-ერთი ყველაზე საინტერესო ექსპონატი იქნება ივანიშვილის ბაღში. ამ ხე-ჰუმანოიდს ლაპარაკიც შეუძლია, ხოლო თუ I am Groot-ის ნაცვლად You are Brdzeeeen ან რამე მსგავს ფრაზას ისწავლის, შეიძლება შემდეგი მოწვევის პარლამენტშიც ამოყოს თავი.

2. ხისწვერა

ფოტო: New Line Cinema

ამ უძველეს ხეს შეუძლია ბატონი ბიძინა ხელისგულზე ატაროს, ხოლო თუ საჭირო გახდება, ზოგ-ზოგიერთ პოლიტიკოსსა და მატრაკვეცა ადამიანს ქვებიც დაუშინოს.

ხისწვერას გადატანა ადვილი საქმეა, ის თავად მივა ბატონ ბიძინასთან. თუ ბატონი ბიძინა არ მივა ხესთან, ხე მივა ბატონ ბიძინასთან.

3. ხმელი წიფელი

ფოტო: tr3gin / Shutterstock

ლეგენდის თანახმად, ვაჟას მიერ აღწერილი ხმელი წიფელი ჯერ კიდევ დგას იქ, სადაც ადრე იდგა. მართალია, ამ ხის ზუსტი ლოკაცია უცნობია, მაგრამ მისი ამორგვა მოთხრობიდანაც შეიძლება. ხოლო თუ შესაბამისი ტექნოლოგიები ჯერ არ გამოუგონიათ, ბატონი ბიძინა რომელიმე არსებულ წიფელს გაახმობს და სიმბოლურობით დატვირთავს. ეს მას არ გაუჭირდება.

4. ნიუტონის ვაშლის ხე

ფოტო: Catalin Petolea / Shutterstock

ნიცშესა და კანტის ფილოსოფიის ეჭვქვეშ დაყენების შემდეგ, დროა, ბატონმა ბიძინამ გრავიტაციასაც გადახედოს და თავისი მოსაზრებები ამ ძალის შესახებაც გაგვიზიაროს.

ამისთვის კი, რა თქმა უნდა, საჭიროა ისააკ ნიუტონის ვაშლის ხე, რომლის ქვეშაც ივანიშვილი წამოწვება და ვაშლის თავში არდაცემის შემდეგ დაადგენს, რომ გრავიტაცია არ არსებობს.

5. ხე ცნობადისა და ხე ცხოვრებისა

ფოტო: zentilia / Shutterstock

ამ ხემ თავისი თავი ამოწურა, მის გამო ადამიანები სამოთხიდან გამოდევნეს, მაგრამ როგორც ექსპონატი, ერთ-ერთი საუკეთესო მცენარეა.

ამავე ხის გამოყენებით შესაძლებელია ერთგულების ტესტების ჩატარება და იმის განსაზღვრა, ვინ იმსახურებს რისხვას და ვინ - დაყვავებას. ხე ცნობადისა დენდროლოგიურ პარკს ნამდვილ სამოთხედ გადააქცევს.

6. მტარვალი ტირიფი

ფოტო: WB

მტარვალი ტირიფი ერთ-ერთი ყველაზე საშიში მცენარეა მსოფლიოში. ის თავს ესხმის ყველას და ყველაფერს, მაგრამ ფესვებთან ახლოს მას ერთი კორძი აქვს, რომელზე ხელის დაჭერისასაც ხე შეშდება და ვეღარ ინძრევა. სწორედ ამ მეთოდით შეიძლება მისი დაოკება და შემდეგ ბატონი ბიძინას ბაღჩაში გადარგვა. რა თქმა უნდა, ტირიფმა ფუნქციის შესრულება მოგვიანებით ისევ უნდა დაიწყოს, რაც ბერას და მისი ძმაკაცებს მფრინავი მანქანების მოპარვაში და აქეთ-იქით "კატაობაში" შეუშლის ხელს.

7. მოკუჯინი

ფოტო: Namco

მოკუჯინი იდეალური იქნებოდა ბაღის დაცვის როლში, რადგან მოძრაობა და სხვადასხვა ილეთით ჩხუბი შეუძლია. მოკუჯინი დიდი ვირეშმაკა ხეა, რომელიც კარგად ემახსოვრებათ ცნობილი ვიდეოთამაშის, Tekken-ის მოყვარულებს.

ეს ხის კუნძი შემთხვევითობის პრინციპით ირჩევს სხვადასხვა პერსონაჟის ჩხუბის სტილს და ხან იოშიმიცუა და ხან - ედი.

8. ვირვუდი/გოდსვუდი

ფოტო: HBO

რა თქმა უნდა, ამ ჯადოსნური ხის გარეშე არც ერთი ბაღი არ ბაღობს. ამ ულამაზესი ხის ამოძირკვა და წამოღება უწინ ძნელი იქნებოდა, მაგრამ მას შემდეგ, რაც ბრენმა შეცდომა დაუშვა და იქ ღამის მეფის არმიამ შეაღწია, ამ მცენარის უზარმაზარი ფუღურო ცარიელია და მისი წამოთრევა დიდ დაბრკოლებებთან აღარაა დაკავშირებული.

მინდა ბატონ ბიძინას ვურჩიო, რომ ფიჭვამდე სწორედ ამ ხით დაინტერესდეს. ამჟამად მთელი ვესტეროსი ისეა გართული ომში, ვერც ვერავინ შეამჩნევს, ვინმემ ამ ხეს ხელი რომ დაავლოს და შეკვეთილში გადააბრძანოს.

დიდი იმედი მაქვს, რომ ბატონი ბიძინა ჩემს რჩევებს გაითვალისწინებს და წარმატებულ დენდროლოგიურ პარკს მოიწყობს.