პარტია მოქალაქეების ლიდერი, ალეკო ელისაშვილი აცხადებს, რომ საღამოს ათი საათის შემდეგ გადაადგილების შეზღუდვას არ დაემორჩილება. როგორც მან რუსთავი 2-ის ეთერში განაცხადა, აღნიშნული შეზღუდვა ოპოზიციის წინააღმდეგ არის მიმართული.

"10 საათიდან 7 საათამდე არ იცის კორონა, თუ პირიქით, კორონას საფრთხეა ღამე? ეს არის ოპოზიციის დემონსტრაციის წინააღმდეგ მიმართული და ბოროტად იყენებენ თავიანთ ძალაუფლებას. ხალხი რომ არ აპროტესტებდეს ქუჩაში, იმიტომაა ეს რაღაცა. შესაბამისად, რასაც არ ვეთანხმები, იმას არ ვიცავ, როგორც უნდა ისე გაიგონ. ეს არის ჩემი უფლებების და დემონსტრაციის შეზღუდვა, ეს არის პოლიტიკური გადაწყვეტილება", — განაცხადა ელისაშვილმა.

დღეს, 9 ნოემბერს პარლამენტის წინ ორი აქციაა დაგეგმილი. 6 საათზე ოპოზიცია მართავს აქციას, ხოლო 10 საათზე მოძრაობა სირცხვილიას აქცია "დაუმორჩილებლობა" დაიწყება.

საკოორდინაციო საბჭოს გადაწყვეტილებით, დღეიდან, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდება. შეზღუდვა გავრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.