საქართველოს პრეზიდენტის, სალომე ზურაბიშვილის განცხადებით, დროა, საქართველომ დაინახოს და დააფასოს "პატარა კახის" ნამოღვაწარი. მისი თქმით, მეფე ერეკლე მეორე საბჭოთა იდეოლოგიის გამო მხოლოდ გეორგიევსკის ტრაქტატთან იყო გაიგივებული და დაუმსახურებლად მიიჩნეოდა პრორუსად მაშინ, როცა ევროპული ორიენტირის მქონე ქართველი სახელმწიფო მოღვაწე იყო.

"ერეკლე II-ის დაბადებიდან 300 წელი შესრულდა. მისი მემკვიდრეობის ობიექტური შეფასების დროც დადგა!", — აცხადებს პრეზიდენტი.

ზურაბიშვილმა ამ ფაქტის აღსანიშნად განცხადება გაავრცელა, რომელშიც განიხილავს ერეკლე მეორის მიღწევებს სამხედრო თუ სახელმწიფო სფეროში, საშინაო და საგარეო პოლიტიკაში და აცხადებს, რომ ეს ფაქტები მივიწყებული ან დამახინჯებულია, მსგავსად დანარჩენი ისტორიისა.

"დამოუკიდებელ საქართველოში კი ნაცვლად მისი მოღვაწეობის ხელახალი გადააზრებისა, საბჭოთა პროპაგანდისეული კლიშეების ინერციით გაგრძელდა ამავე ხელმოწერის გამო მისი განუზომელი მემკვიდრეობის უგულებელყოფა.

დროა დავიწყოთ მისი ღვაწლის გახსენება და აღიარება!" — წერია პრეზიდენტის ადმინისტრაციის გავრცელებულ განცხადებაში.

პრეზიდენტი აღნიშნავს, რომ დღევანდელი საქართველო და ზოგადად რეგიონის ქვეყნები ვცხოვრობთ გეოპოლიტიკურ მოცემულობაში, რომელიც ერეკლე II-ის პოლიტიკური აზროვნებისა და მოღვაწეობის შედეგია.

"დღემდე დაუმსახურებლად პრორუსულად შერაცხული მეფე ერეკლე, რეალურად იყო ევროპული ორიენტირის მქონე ქართველი სახელმწიფო მოღვაწე, საქართველოს გაერთიანებისა და გაძლიერებისთვის დაუღალავი მებრძოლი, კავკასიის შემკვრელი და გამაძლიერებელი, რეფორმატორი და განმანათლებელი, ერთდროულად მეომარი და დიპლომატი.

დროა დავინახოთ და დავაფასოთ "პატარა კახის" დიდი ნამოღვაწარი", — აცხადებს პრეზიდენტი.