2020 წელს, როცა მსოფლიოში უკვე პანდემია იყო, საქართველოს პრეზიდენტის ადმინისტრაციამ მივლინებებში 272 908 ლარი დახარჯა. მათ შორის უმეტესობა, 236 312 საზღვარგარეთ, ხოლო 36 596 ქვეყნის შიგნით ვიზიტებისთვის.

აღსანიშნავია ისიც, რომ პრეზიდენტის ადმინისტრაციის მიერ გამოქვეყნებული დოკუმენტების მიხედვით, სალომე ზურაბიშვილი ან მისი თანამშრომლები ქვეყნის ფარგლებს გარეთ მივლინებით მხოლოდ 2020 წლის პირველ კვარტალში, ანუ იანვრიდან მარტის ჩათვლით იმყოფებოდნენ. შემდეგი ორი კვარტლის ხარჯი მთლიანად შიდა ვიზიტებს უკავშირდება.

ადმინისტრაციას ამ დროისთვის გამოქვეყნებული აქვს მხოლოდ სამი კვარტლის მონაცემები და ნოემბრიდან დეკემბრის ჩათვლით დახარჯული ფინანსების შესახებ, სავარაუდოდ, წლის ბოლოს გახდება ცნობილი.

გამომდინარე იქედან, რომ ქვეყნის საზღვრებს გარეთ ვიზიტები პირველ კვარტალშია, ყველაზე მეტი ხარჯიც სწორედ მარტამდე პერიოდს უკავშირდება. ყველაზე ნაკლები კი მეორე კვარტალს — აპრილიდან მაისამდე პრეზიდენტის ადმინისტრაციამ მივლინებებში 2 233 ლარი დახარჯა და მთლიანად შიდა ვიზიტებში.

განახლება: პანდემიის დროს სამივლინებო ხარჯების გამო კრიტიკის პასუხად, სალომე ზურაბიშვილმა ქვეყნის სხვა პრეზიდენტების ხარჯები გამოაქვეყნა და ლარის იმდოინდელი კურსიც მიუთითა. რაც შეეხება მას, ადმინისტრაცია განმარტავს, რომ პანდემიის ფართოდ გავრცელების დროიდან, მე-9 თვის ჩათვლით, ვიზიტებში დაიხარჯა 21 000 ლარი, "რადგან სხვა ყველა დანარჩენი ხარჯი ანაზღაურებული იყო პრეზიდენტის პირადი სახსრებით".