ევროპული საქართველოს ერთ-ერთი ლიდერის, სერგი კაპანაძის განცხადებით, ქართული ოცნება ოპოზიციისთვის სახელმწიფო გადატრიალების დაბრალებას აპირებს. იგი ეხმაურება ირაკლი კობახიძის სახელმწიფო უსაფრთხების სამსახურში დაბარებას და ამბობს რომ "მელამ თავისი კუდი მოიყვანა მოწმედ".

"ახლა მოიგონეს ის, რაც დიდი ხანია მათი მხრიდან მოდის და გვესმის, თითქოს ოპოზიცია აპირებს რაღაც გადატრიალებას. ყველაზე საინტერესო და სასაცილო ამ ამბავში ის არის, რომ მელამ თავისი კუდი მოიყვანა მოწმედ და კობახიძე არის ის, ვინც სუს-ში მივიდა, თითქოს რაღაც ინფორმაცია მიაწოდა", — განაცხადა კაპანაძემ.

სერგი კაპანაძის ინფორმაციით, ოპოზიციისთვის სახელმწიფო გადატრიალების დაბრალება, ერთ-ერთია იმ მეთოდებს შორის, რასაც ბიძინა ივანიშვილი ოპოზიციის წინააღმდეგ იყენებს.

"ახლა ცდილობს სხვადასხვა ინსტრუმენტი გამოიყენოს, რომ ერთი მხრივ ოპოზიცია შეაშინოს [...] მეორე მხრივ — ხალხი.

ხალხს აშინებს იმით, რომ პანდემია არის და გარეთ არ გამოხვიდეთ. რაღაც შეზღუდვების შემოღებას აპირებს ამის გამო, ხოლო, ოპოზიციას ევაჭრება, დაფინანსებას შეგიწყვიტავო და არ ესმის, რომ დაფინანსება არ არის ის საკითხი, რომლის გამოც ოპოზიცია უარს იტყვის არჩეულ სტრატეგიაზე", — აცხადებს კაპანაძე.

ქართული ოცნების აღმასრულებელი მდივანი, ირაკლი კობახიძე სახელმწიფო უსაფრთხოების სამსახურში გამოკითხვაზე გუშინ, 5 ნოემბერს დაიბარეს. უწყებაში ამბობენ, რომ გამოძიების ინტერესებიდან გამომდინარე, გამოკითხვის მიზეზს ვერ გაასაჯაროვებენ.

არჩევნებამდე ერთი დღით ადრე, 30 ოქტომბერს კობახიძე ამტკიცებდა, რომ არჩევნების დღეს ოპოზიციას წინასაარჩევნოდ ხელკეტებითა და ელექტროშოკებით აღჭურვილი ეკიპაჟები ჰყავდათ მობილიზებული. ამავე დღეს, შინაგან საქმეთა სამინისტრომ კობახიძის ბრალდების საფუძვლების შესწავლა დაიწყო.

გაიგეთ მეტი: