გირჩის ერთ-ერთი ლიდერის, ვახო მეგრელიშვილის განცხადებით, არჩევნების მეორე ტურში მონაწილეობა არის ერთადერთი მშვიდობიანი გამოსავალი ხელისუფლებისთვის და მისაღები გამოსავალი შეიძლება გახდეს ოპოზიციისთვისაც, თუ ქართული ოცნება გაითვალისწინებს მათ უნდობლობის მესიჯს. მეგრელიშვილის თქმით, ხმების 48% ქართულმა ოცნებამ დაიწერა, ახლა კი ხელისუფლებასა და ოპოზიციას შორის პოლიტიკური შეთანხმება უნდა მოხდეს და მთავრობამ უარი უნდა თქვას იმ პროცენტზე, რაც დაიწერა.

"ქართულმა ოცნებამ შექმნა რევოლუციური მდგომარეობა ქვეყანაში, რა შეიძლება იყოს არარევოლუციური გამოსავალი? ქართულმა ოცნებამ ნება იბოძოს და შეისმინოს სრულიად ოპოზიციური სპექტრის უნდობლობის მესიჯი. მეორე ტურში გაირკვეს, ვისია ხელისუფლება. მეორე ტური, შეიძლება, ერთადერთი მშვიდობიანი გამოსავალი იყოს ხელისუფლებისთვის და მისაღები ოპოზიციისთვის. მოდით, დავცხოთ მეორე ტურში და ვინც გაიმარჯვებს, იმის იყოს ხელისუფლება", — განაცხადა ვახო მეგრელიშვილმა რუსთავი 2-თან.

თბილისსა და საქართველოს სხვადასხვა ქალაქის საოლქო საარჩევნო კომისიებთან საპროტესტო აქციები მიმდინარეობს. 31 ოქტომბრის საპარლამენტო არჩევნების შედეგებს ოპიზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს.