საქართველოს მოსახლეობის 72 პროცენტისთვის მისაღებია „მთავრობის გაცხადებული მიზანი საქართველო გახდეს ევროკავშირის წევრი“. დანარჩენი 18 პროცენტისთვის კი - მიუღებელი. ეს შედეგი აჩვენა NDI-ს მიერ ჩატარებულმა კვლევამ.

თუ ამ შედეგებს NDI-ს კვლევის წინა მონაცემებს შევადარებთ, 2016 წლის მარტში მოქალაქეთა უფრო მეტ წილისთვის იყო მისაღები მთავრობის მიზანი. 2012 წლიდან დღემდე ჩატარებული გამოკითხვები კი აჩვენებს, რომ მოქალაქეების ყველაზე დიდი წილისთვის მთავრობის ეს მიზანი მიუღებელი 2015 წელს ჩატარებული კვლევის დროს იყო.

დღეს, 16 იანვარს, ეროვნულ-დემოკრატიული ინსტიტუტი (NDI) და CRRC–საქართველო მედიას 2016 წლის ნოემბერ-დეკემბერში ჩატარებული საზოგადოებრივი აზრის კვლევის შედეგების პირველ ნაწილს წარადგენს. პრეზენტაციაზე წარმოდგენილი არის ქვეყნის განვითარების კურსთან, საგარეო პოლიტიკასთან, ადგილობრივ თვითმმართველობასთან და ქალების პოლიტიკურ ჩართულობასთან დაკავშირებული მიგნებები.

კვლევის საველე სამუშაოები ჩატარდა 4 ნოემბერი - 4 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 3,141 პირისპირ ინტერვიუს წარმომადგელობითი შერჩევის საფუძველზე.

NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC–საქართველო.