საქართველოს ყოფილი პრეზიდენტისა და ნაციონალური მოძრაობის ლიდერის, მიხეილ სააკაშვილი განცხადებით, უახლოეს დღეებში გამოაცხადებს, სად იქნება ფიზიკურად. ამის შესახებ მან მთავარი არხის ეგზიტპოლების შემდეგ, ამავე არხის ეთერშივე ისაუბრა.

"მე ჩემს ქვეყანაში, რომელიც მენატრება უზომოდ, რომელიც მიყვარს უზომოდ, სიცოცხლეზე მეტად, თითქმის 8 წელიწადია არ მიშვებს ვიღაც თავგასული ოლიგარქი; ის, რომ უამრავ ადამიანს აღარ დაედგომება საქართველოში, ის რომ ის ყრის ქვეყნიდან საუკეთესო შვილებს და უნდა, რომ ყველა გაყაროს, რა თქმა უნდა, მე მაწუხებს. ფიზიკურად სად ვიქნები, ამის შესახებ გამოვაცხადებ, ჩემს გეგმებზე, უახლოეს დღეებში. მინდა ვთქვა, რომ მე არ მეშინია არც მათი ციხის, არც პარაშენკოს ციხის შემშინებია და თავის დროზე, როცა გამაგდო უკრაინიდან, დავბრუნდი უკრაინაში", — განაცხადა მიხეილ სააკაშვილმა.

ჟურნალისტის კითხვას, გულისხმობს თუ არა, რომ აპირებს საქართველოში დაბრუნებას, მან ასე უპასუხა:

"მე დამარცხებული ივანიშვილის და არც ძველი ივანიშვილის არასდროს მეშინოდა, არასდროს მინდოდა შემექმნა პრობლემა ჩემი ხალხისთვის, მაგრამ განშორება ჩემთვის ჩემს ქვეყანასთან არის ძალიან მძიმე, მაგრამ ჩემი თავი აქ არის მეასე ხარისხოვანი საერთოს და ნებისმიერი ადამიანის თავი. მე არ მაინტერესებს არც ერთ თანამდებობა, მაინტერესებს ერთიანობა და კრიზისის დაძლევა".

მანამდე, მიხეილ სააკაშვილმა თქვა, რომ პრემიერმინისტრის თანამდებობა არ აინტერესებს და უნდა ჩამოყალიბდეს "ეროვნული ერთიანობის მთავრობა" და იქ კონსენსუსური ფიგურები უნდა იყვნენ.

8 საათზე ცნობილი გახდა მთავარი არხის ეგზიტპოლის შედეგები, რომლის მიხედვითაც ენმ-სა და ძალა ერთობაშიას 33% აქვთ, ქართულ ოცნებას კი — 41%.

სხვა შედეგები ასეთია:

  • ევროპული საქართველო — 5%
  • ლელო — 4%
  • პატრიოტთა ალიანსი — 3%
  • სტრატეგია აღმაშენებელი — 3%
  • გირჩი — 3%
  • ალეკო ელისაშვილი და მოქალაქეები — 1%
  • ერთიანი საქართველო - დემოკრატიული მოძრაობა — 1%

მთავარმა არხმა ეგზიტპოლები ფრანგულ IPSOS-ს დაუკვეთა.

ეგზიტპოლების შესახებ

არჩევნების დღეს ეგზიტპოლები დამოუკიდებელმა ორგანიზაციებმა, მედიებმა და ISFED-მა ჩაატარეს. მათი შედეგები 8 საათზე გავრცელდა.

  • წელს არჩევნებზე ეგზიტპოლს ამერიკულ კომპანია Edison Research ტელეკომპანია ფორმულას დაკვეთით ატარებს.
  • მთავარი არხისთვის ეგზიტპოლებს ატარებს ფრანგული კომპანია IPSOS.
  • რუსთავი 2-სთვის ეგზიტპოლებს ბრიტანული კვლევითი კომპანია Survation ატარებს.
  • ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

ედისონს საქართველოში სხვადასხვა დროს აქვს ეგზიტპოლი ჩატარებული. იუსტიციის სამინისტროს მიერ გამოქვეყნებული ინფორმაციით, IPSOS 2019 წელს ატარებდა კვლევას საქართველოში სასამართლო რეფორმების შესაფასებლად. Survation და Public Opinion Strategies კი საქართველოში ეგზიტპოლებს პირველად ატარებენ.