საქართველოს პრეზიდენტის, სალომე ზურაბიშვილის განცხადებით, ერთი პირის გამო, ვინც არ უნდა იყოს ეს პირი, დანაშაულის მთელ ჯარზე გავრცობა წარმოუდგენელია.

სალომე ზურაბიშვილის განცხადებით, ის, როგორც საქართველოს თავდაცვის ძალების უმაღლესი მთავარსარდალი, ჯარის დისკრედიტაციის მცდელობებს კატეგორიულად გმობს.

"მიუღებელია დამაკნინებელი და მადისკრედიტირებელი შეფასებების გავრცელება მთლიანად ჯარზე. მით უფრო, ქვეყანაში რომლის ტერიტორიები ოკუპირებულია და რომელიც ისწრაფვის ნატოსკენ; ასეთი უსაფუძვლო ბრალდებები პირდაპირ უთხრის ძირს ქვეყნის ინტერესებს, და ემსახურება დესტაბილიზაციას თუ უცხო ინტერესებს", — განაცხადა ზურაბიშვილმა.

პრეზიდენტის თქმით, არჩევნების დროს იმ ინსტიტუტებსა და პიროვნებებზე დისკრედიტაციის მცდელობები იკვეთება, ვისაც საზოგადოება ენდობა და რომლებიც ხვალინდელი დღისთვის ყველაზე მეტად საჭიროა. სალომე ზურაბიშვილის თქმით, ესენია — ჯარი, სამართალდამცავები და ჯანდაცვის წარმომადგენლები.