ზუგდიდში შეიარაღებული თავდასხმის დროს ბანკში მყოფი ერთ-ერთი მძევალი, ირაკლი კვარაცხელია აცხადებს, რომ თავდამსხმელი დაახლოებით, ბადრი ესებუას აღნაგობისაა. თუმცა, მისი თქმით, ასეთი აღნაგობის შეიძლება უმარავი ადამიანი იყოს.

"მე არ შემიძლია, ეს ადამიანი გამოვრიცხო, იქიდან გამომდინარე, რომ იმდენად განსხვავებული არ არის. თუმცა მიუხედავად იმისა, რომ შინაგან საქმეთა სამინისტრომ დაადასტურა ეს, არც ის არ არის გამორიცხული, რომ ეს არ იყოს ის ადამიანი [...] ფიგურა ამ ადამიანის, წააგავს, ვინც ბანკში შემოვარდა, თუმცა ასეთი აღნაგობის შეიძლება უამრავი იყოს. იმ ინფორმაციიდან და შესაძლებლობებიდან გამომდინარე, რაც მე მაქვს, უბრალოდ შემიძლია ვთქვა ეს, რომ, დაახლოებით, ამ აღნაგობის ადამიანი იყო ბანკში", — აღნიშნა კვარაცხელიამ.

შინაგან საქმეთა სამინისტრომ, 26 ოქტომბერს დაადასტურა, რომ ზუგდიდში ბანკზე თავდამსხმელი ბადრი ესებუაა. მათი განცხადებით, მისი ადგილსამყოფელის დადგენისა და დაკავების მიზნით, სპეციალურ ოპერატიულ და სამძებრო მოქმედებებს განაგრძობს. მთავარი არხის ეთერში ნიკა გვარამიამ 25 ოქტომბერს განაცხადა, რომ 21 ოქტომბერს ზუგდიდში, საქართველოს ბანკში ბადრი ესებუა შეიჭრა

21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლების გარდა თავდამსხმელმა წაიყვანა სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. შეიარაღებულ პირთან მოლაპარაკებებს ის აწარმოებდა.

გაიგეთ მეტი: