ლელოს გლდანის მაჟორიტარი დეპუტატობის კანდიდატმა, გიგლა მიქაუტაძემ გლდანში მოუწესრიგებელი ინფრასტრუქტურის შესახებ ბრიფინგი გამართა და შსს-დან მიღებული ავტოსაგზაო შემთხვევების სტატისტიკაზეც ისაუბრა.

მიქაუტაძის ინფორმაციით, შსს-დან მიღებული მონაცემებით დგინდება, რომ ივნისიდან სექტემბრის ჩათვლით 24 ავტოსაგზაო შემთხვევა მოხდა ამ ტერიტორიაზე, სადაც დაშავდა 26, ხოლო, დაიღუპა ერთი ადამიანი.

როგორც მიქაუტაძემ აღნიშნა, გლდანის ქუჩების რეაბილიტაცია წელიწად-ნახევარია მიმდინარეობს და ამ დროის განმავლობაში ქუჩები არ დაუხაზავთ, რაც, მისი თქმით, ავტოსაგზაო შემთხვევების გამომწვევი მიზეზია.

"აქ ხდება ყოველდღე უამრავი ავტოსაგზაო შემთხვევა, იმიტომ, რომ გზები არის მოუწესრიგებელი, მანქანები მოძრაობენ ქაოტურად და ჩვენ ჯერ კიდევ სექტემბერში, მივმართეთ მერიას, რომ დაესრულებინა ეს პროექტი, მიეყვანა ბოლომდე. მას შემდეგ გავიდა ორი თვე და დღემდე ამ მდგომარეობაშია ეს ქუჩები. ამის გამო გადავწყვიტეთ, ჩვენი ხელით დაგვეხაზა ქვეითთა გადასასვლელი, რა დროსაც პოლიციამ გაგვაჩერა, გვითხრა, რომ ეს ჩვენი საქმე არ არის. თუმცა, არც ის აკეთებს, ვისი საქმეცაა. მერია არის უმოქმედო და უუნარო, მოქალაქეებს აქვთ სრული უფლება, საკუთარი ხელებით და საკუთარი ძალებით მოაგვარონ პრობლემა. დახაზულიც კი არ არის ეს ქუჩები იმისთვის, რომ ადამიანებმა უსაფრთხოდ იმოძრაონ", — განაცხადა მიქაუტაძემ.