საქართველოს ბანკი ყველა ფილიალში დაცვას აძლიერებს. On.ge-ს ამის შესახებ კომპანიაში წყარომ განუცხადა.

სხვა დეტალები ამ დროისთვის უცნობია.

გუშინ, 21 ოქტომბერს, ზუგდიდში მდებარე საქართველოს ბანკში შეიარაღებული პირი შეიჭრა და მძევლები აიყვანა. ის ერთ-ერთი მძევლის საშუალებით მედიას დაუკავშირდა და 500 000 დოლარი და ტერიტორიიდან უსაფრთხო გასვლა მოითხოვა. დაახლოებით 8 საათის შემდეგ, მძარცველმა საქართველოს ბანკის შენობა პოლიციის მანქანით დატოვა. მას ერთ-ერთ მძევლად სამხარეო პოლიციის უფროსი, ავთანდილ გალდავა გაჰყვა. შსს-ს ინფორმაციით, ყველა მძევალი, გარდა თავდამსხმელთან ერთად მყოფებისა, უკვე გათავისუფლებული იყო. 04:47 საათზე ცნობილი გახდა, რომ გათავისუფლდნენ სხვა მძევლებიც, მათ შორის, გალდავა. შსს არ ავრცელებს ინფორმაციას იმაზე, მისცეს თუ არა თავდამსხმელს მოთხოვნილი თანხა და შეძლო თუ არა მან თანხით გაქცევა. მათი განცხადებით, მიმდინარეობს საგამოძიებო მოქმედებები.

გარდა ამისა, დღეს, ქობულეთში, საქართველოს ბანკთან დააყაჩაღეს ბანკის პარტნიორი კომპანიის, DDG-ის ინკასატორი. შსს-მ გამოძიება ძარცვის მუხლით დაიწყო.