აზერბაიჯანის პრეზიდენტი, ილჰამ ალიევი ერთი ქალაქისა და რამდენიმე სოფლის აღების შესახებ იუწყება. მედია გამოცემა APA-ს ალიევზე დაყრდნობით წერს, რომ აზერბაიჯანულმა არმიამ კონტროლი დაამყარა ქალაქ ზანგილანსა და რეგიონის ათეულობით სოფელზე.

სომხური მხარე კი აცხადებს, რომ ჩრდილოეთ ნაწილში მოწინააღმდეგე ავიაციასა და არტილერიას იყენებს. სომხეთის თავდაცვის სამინისტროს პრესმდივნის, შუშან სტეპანიანის განცხადებით, ინტენსიური ბრძოლები სამხრეთის მიმართულებით გრძელდება. მისივე თქმით, თავდაცვიის არმიის ქვედანაყოფები მტრის შემოტევის თავიდან ასაცილებლად შესაბამის ზომებს ატარებენ.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი, ორივეჯერ მალევე დაირღვა. ბაქომ და ერევანმა ცეცხლის შეწყვეტაში ისევ ერთმანეთი დაადანაშაულეს.