ბათუმში ჩატარებული აქციის კრიტიკას ნაციონალური მოძრაობის წევრი, ხატია დეკანოიძე მმართველ გუნდს პასუხობს და მოუწოდებს, "საკუთარი ღრეობები მოიკითხონ". ამის შესახებ მან TV პირველს განუცხადა.

"საკუთარი ქორწილები, საკუთარი დაბადების დღეები, საკუთარი შვილის ნათლობები, საკუთარ საზოგადოებრივ ტრანსპორტში "ზედახორა" და დენდროლოგიურ პარკი, საკუთარი ჩუმად ჩაკეტილი, უკაცრავად ამ სიტყვისთვის, ღრეობები მოიკითხონ", — თქვა დეკანოიძემ.

მისი თქმით, მოქალაქეებისთვის ხელისუფლებიდან ბიძინა ივანიშვილის ჩამოშორებაა მნიშვნელოვანი და ისინი მაქსიმალურად ცდილობენ დაიცვან და გაითვალისწინონ უსაფრთხოების ზომები.

16 ოქტომბერს კოვიდპანდემიის ფონზე ბათუმში ნაციონალურმა მოძრაობამ მრავალრიცხოვანი აქცია გამართა. აქციაზე არ იყო დაცული სოციალური დისტანცია და მოქალაქეებს პირბადეები არ ეკეთათ.

შეკრებილებს ექსპრეზიდენტმა, მიხეილ სააკაშვილმა მიმართა და ამტკიცებდა, რომ ხელისუფლებამ ბათუმში კოვიდინფექცია ხელოვნურად გაავრცელა. ის ხალხს დაპირდა, რომ მომავალში საქართველოს ვერცერთი ვირუსი მოერევა.

ჟურნალისტების კითხვაზე, იღებდა თუ არა ოპოზიცია პასუხისმგებლობა ბათუმში რეკომენდაციების გარეშე ჩატარებულ აქციაზე, პარტიის ლიდერმა, გრიგოლ ვაშაძემ უპასუხა:

"პასუხისმგებლობა აბსოლუტურად მთლიანად ეკისრება კორონავირუსს და შემიძლია მიგაგზავნოთ კორონავირუსთან".

სახალხო დამცველი ნინო ლომჯარიას თქმით, როცა გავრცელების კრიტიკულ მასშტაბს მიღწეულ რეგიონში შესაძლებელია უპირბადოდ, დისტანციის დაუცველად შეიკრიბოს ათასობით ადამიანი, ორგანიზატორების მხრიდან "უკიდურესი უპასუხისმგებლობა".

ამავე თემაზე: