ჯანდაცვის მინისტრმა, ეკატერინე ტიკარაძემ დღეს სადაზღვეო კომპანიების წარმომადგენლებთან შეხვედრა გამართა. შეხვედრის თემა კორონავირუსის წინააღმდეგ ბრძოლაში ონლაინკლინიკების მართვის კუთხით სადაზღვეო კომპანიების ჩართულობა, ექიმების რაოდენობის გაზრდა და გაძლიერება იყო.

"თქვენ საკმაოდ კარგი გამოცდილება გაქვთ ონლაინკლინიკების მართვის კუთხით, გყავთ საკმაოდ დატრენინგებული და პროფესიონალი ოჯახის ექიმები . დღეს არა მხოლოდ სახელმწიფოს, არამედ თქვენს ბენეფიციარებს, ჩვენს მოქალაქეებს ესაჭიროება გამართული ინფრასტრუქტურა და სწორად დატრენინგებული ექიმები. ინფიცირებულების ნაწილი დაზღვეულია და მათი კოორდინირებული მართვა ძალიან მნიშვნელოვანია. ჩვენ მზად ვართ, თქვენს გვერდით ვიდგეთ", — განაცხადა ეკატერინე ტიკარაძემ.

ჯანდაცვის მინისტრმა შეხვედრაზე სადაზღვეო კომპანიებისა და სახელმწიფოს კოორდინირებულ მუშაობას გაუსვა ხაზი. მანვე აღნიშნა, რომ პროფესიონალი ოჯახის ექიმების როლი კორონავირუსის წინააღმდეგ ბრძოლაში უმნიშვნელოვანესია.

"ვიღაცამ უნდა გააკეთოს ტრიაჟი და თქვას, რომ ეს ადამიანი უნდა წავიდეს საავადმყოფოში, სასტუმროში, თუ შეიძლება დარჩეს სახლში და სახლში მერე მიხედონ. ზუსტად ეს ნაწილი არის გასაკეთებელი სადაზღვეოების თავის დაზღვეულებთან მიმართებაში", — განაცხადა საქართველოს სადაზღვევო კომპანიების ასოციაციების თავმჯდომარემ, დევი ხეჩინაშვილმა.

მისივე თქმით, სადაზღვეოები, ასევე, დაზღვეულებს უნდა მოემსახურონ იმ ათი დღის განმავლობაში, როდესაც პროტოკოლის მიხედვით, ისინი სახლში იქნებიან.