ოკუპირებული სამხრეთ ოსეთის დე ფაქტო პრეზიდენტ ანატოლი ბიბილოვის პრესმდივან დინა გასიევას Covid-19 დაუდასტურდა. ინფორმაციას ამის შესახებ ე.წ. სახელისუფლებო მედია რესი ავრცელებს. მედიის თანახმად, დაინფიცირების შესახებ გასიევამ თავად გაავრცელა ინფორმაცია. პრესმდივნის თქმით, კორონავირუსზე ტესტი ბიბილოვმაც გაიკეთა, თუმცა გასიევა ამბობს, რომ მას ვირუსი არ დაუდასტურდა.

ე.წ. სამხრეთ ოსეთის დე ფაქტო ჯანდაცვის უწყების ცნობით, კორონავირუსის დაფიქსირებიდან დღემდე რეგიონში ინფიცირების 139 შემთხვევა გამოვლინდა. თუმცა, უცნობია, რამდენად ზუსტია ეს მონაცემი, რადგან საქართველოს ცენტრალურ ხელისუფლებას ოკუპირებული ტერიტორიებიდან ზუსტი ინფორმაცია არ აქვს.

რესის ცნობით, Covid-19 დაუდასტურდა რეგიონის მთავარ ექიმ მარინა კოჩიევასაც, რომელიც ამჟამად მკურნალობის პროცესს გადის.