საქართველოს პროკურატურის განცხადებით, თბილისში ჩატარებული სპეცოპერაცია, ათეულობით მილიონი სხვადასხვა ვალუტის თანხების შესაძლო გათეთრების საქმეს ეხებოდა. მათივე ინფორმაციით, 13 ოქტომბერს თბილისში რამდენიმე ობიექტზე ჩატარებული ჩხრეკის შედეგად, დოკუმენტაცია და დიდი ოდენობით თანხა იქნა ამოღებული.

"საგამოძიებო მოქმედებების შედეგად ამოღებული ფასეულობების უსაფრთხო ტრანსპორტირების უზრუნველყოფის მიზნით, გამოყენებული იქნა სპეციალური დანიშნულების რაზმის თანამშრომლები. საქმეზე გრძელდება გამოძიება", — ვკითხულობთ პროკურატურის განცხადებაში.

პროკურატურის ცნობით, გამოძიება ჯგუფურად განხორციელებული უკანონო შემოსავლის ლეგალიზაციის საქმეზე მიმდინარეობს, რასაც თან ახლდა განსაკუთრებით დიდი ოდენობის შემოსავლის მიღება.

დღეს, 13 ოქტომბერს ტელეკომპანია პირველმა გაავრცელა ინფორმაცია, რომ სპეცრაზმი და საგამოძიებო სამსახურის თანამშრომლები კომპანია ბროლში შევიდნენ.