ევროპული საქართველოს საარჩევნო შტაბის ხელმძღვანელი, სერგი კაპანაძე, დავით ზალკალიანის განცხადება ეხმაურება, რომელმაც დანიაში საქართველოს ელჩი, გიგი გიგიაძე დავით გარეჯის საქმეზე ყოფილი კომისიის წევრების დაკავებაზე მისი პოზიციის გამო გააკრიტიკა.

კაპანაძის თქმით, ზალკალიანი ნაცვლად იმისა, რომ იცავდეს თავის თანამშრომელს, რომელიც შეთითხნილი ბრალდებით არის დაკავებული, ეხმაურება ელჩის განცხადებას, რომელმაც როგორც კაპანაძე აღნიშნავს, პრინციპული განცხადება გააკეთა.

კაპანაძემ აღნიშნა, რომ ამ ხელისუფლებას არ შეუძლია, არც ღირსეული სამოქალაქო პოზიციის დაჭერა და არც კრიტიკის ატანა.

"სრულიად ნათელია ჩემთვის, რომ ზალკალიანი ამ შემთხვევაში ელაპარაკება ბიძინა ივანიშვილს და ზრუნავს იმაზე, ივანიშვილის მასზე რა შთაბეჭდილების იქნება და არა იმაზე, რომ დაიცვას თავისი უწყების პრესტიჟი, დაიცვას თავისი თანამშრომლები და დაიცვას თავისი ქვეყანა. ეს არის სამწუხარო რეალობა, რომელიც ჩვენ მივიღეთ ივანიშვილის ხელისუფლებაში ყოფნისას, რაც აუცილებლად შეიცვლება მას შემდეგ, რაც ხელისუფლება შეიცვლება 31 ოქტომბერს", — განაცხადა სერგი კაპანაძემ.

მისი თქმით, ეს არის ამ ხელისუფლების ხელწერა და მაგალითად მოიყვანა თეა წულუკიანი, რომელიც, კაპანაძის განცხადებით, იმით არის ცნობილი, რომ თავის თანამშრომლებს პირდაპირ უწესებს ცენზურას და რამდენიმე მათგანი გაათავისუფლა კიდეც თანამდებობიდან. კაპანაძე აღნიშნავს, რომ ეს არის ამ ხელისუფლების ხელწერა, მათ არ შეუძლიათ არც ღირსეული სამოქალაქო პოზიციის დაჭერა და მითუმეტეს, არც კრიტიკის ატანა.~