პრემიერმინისტრი გიორგი გახარია აცხადებს, რომ პრეპარატი რემდესივირი კოვიდის სამკურნალოდ მოქალაქეებისთვის ხელმისაწვდომი ვერ იქნება, რადგან ის ჯანდაცვის მსოფლიო ორგანიზაციის მიერ ლიცენზირებული არაა და ექსპერიმენტულად გამოიყენება. ამის შესახებ მან საკოორდინაციო საბჭოს სხდომის შემდეგ განაცხადა.

"რემდესივირის გამოყენება შესაძლებელი იქნება მხოლოდ და მხოლოდ მძიმე და კრიტიკული პაციენტების შემთხვევაში ისიც იმ დროს, თუ პაციენტების თანხმობა იქნება პრეპარატების მიღებასთან დაკავშირებით", — განაცხადა გახარიამ.

კორონავირუსის სამკურნალოდ საქართველომ ექსპერიმენტული პრეპარატა რემდესივირი შეიძლება 2-3 კვირაში მიიღოს. ამის შესახებ ინფექციური საავადმყოფოს დირექტორმა, თენგიზ ცერცვაძემ ისაუბრა.

კორონავირუსის მკურნალობის დროს რემდესივირის გამოყენებაზე აქტიურად მას შემდეგ დაიწყეს საუბარი, რაც აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელმა, ენტონი ფაუჩიმ განაცხადა, რომ რემდესივირმა ეფექტიანობა აჩვენა.

რემდესივირის საქართველოში შემოტანას ჯანდაცვის სამინისტროში ჯერ კიდევ მაისის ბოლოსთვის ვარაუდობდნენ.