სომხეთის პრემიერიმინისტრის, ნიკოლ პაშიანის განცხახებით, სომხეთი და ყარაბაღი მზად არიან აზერბაიჯანთან კომპრომისებზე ისაუბრონ. პრემიერის ინტერვიუს ნაწილს, რომელიც მან გამოცემა AFP-ს მისცა, ფაშინიანის პრესსპიკერი ავრცელებს.

"კონფლიქტის დარეგულირება კომპრომისების საფუძველზე უნდა მოხდეს. მთიანი ყარაბაღი და სომხეთი მზად არიან დათმობაზე წავიდეს იმდენად, რამდენადაც აზერბაიჯანი მზადაა დათმობებისთვის", — აღნიშნა სომხეთის პრემიერმა.

ერთ კვირაზე მეტია მთიან ყარაბაღში სომხეთ-აზერბაიჯანის სამხედრო დაპირისპირება გრძელდება. 27 სექტემბრიდან ფართომასშტაბიანი სამხედრო მოქმედებები მთიან ყარაბაღსა და სომხეთ-აზერბაიჯანის საზღვარზე ამ დრომდე მიმდინარეობს. ორივე მხარე ავრცელებს ინფორმაციას დაღუპულებზე. კონფლიქტში მონაწილე ორივე მხრიდან გარდაცვლილია 300-მდე, როგორც სამხედრო, ასევე, სამოქალაქო პირი, დაჭრილია 1 000-მდე მოქალაქე.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომხეთსა და მთიან ყარაბაღში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.