თქვენს გაოცებას ნამდვილად ვერ შევძლებთ, თუ გეტყვით, რომ არსებობს ოჯახი, რომელიც ქვევრში ღვინოს აყენებს. თუმცა, რას იფიქრებთ, როცა გაიგებთ, რომ თეთრიწყაროში, ქართულ ქვევრებში ვისკის აწარმოებენ?

ბრენდი ალექსანდრე დისტილერი რამდენიმე დასახელების ღვინოს, შარბათს, ჭაჭას, ხილის არაყსა და, რაც მთავარია, პირველ ქართულ ვისკის — ალექსანდრეს აწარმოებს. ქვევრში მარცვლეულის დისტილატის წარმოება უნიკალურია და მსოფლიოში ანალოგი არ აქვს – უნიკალური მეთოდი საქართველოშია დაპატენტებული, როგორც გამოგონება. გამოგონების ავტორი და პატენტმფლობელი კი ქართველი მეცნიერი, ფიზიკოსი და ინტელექტუალური საკუთრების სპეციალისტი, საქართველოს აკრედიტირებული პატენტრწმუნებული ალექსანდრე კვერნაძეა.

ექსკლუზიური ვისკი თეთრიწყაროს მუნიციპალიტეტში, კერძოდ, სოფელ ალექსეევკაში რამდენიმე წელია იწარმოება. ბიზნესი, რომელიც მეუღლეებმა ნია ნაცვლიშვილმა და ალექსანდრე კვერნაძემ დააფუძნეს, მიზნად არ ისახავდა მხოლოდ მატერიალური სიკეთის მიღებას, არამედ ახალი პროდუქტის შექმნას. როცა თეთრიწყაროში ადგილობრივი განვითარების ჯგუფმა ევროკავშირის მიერ მხარდაჭერილი ENPARD-ის საგრანტო კონკურსის შესახებ მოსახლეობის ინფორმირება დაიწყეს, ოჯახმა ჩათვალა, რომ ეს პროექტი შესაძლებლობას მისცემდათ ბიზნესი გაეფართოვებინათ და უფრო მარტივად მიეწვდინათ ხმა დაინტერესებული საზოგადოებისთვის.

ალექსანდრე დისტილერის საქმიანობა ევროკავშირის პროექტის მხარდაჭერით სამ ძირითად მიმართულებად განვითარდა. სპეციალურად მათი მოთხოვნების გათვალისწინებით დამზადდა თბოენერგეტიკული დანადგარი/გენერატორი, რომელიც გამოყენებული ზეთით იძლევა საშუალებას მივიღოთ ორთქლი, რომელიც საჭიროა ქვევრში არსებული მასის გახურებისთვის – ეს ეკოლოგიურად მართებული ენერგეტიკული დანადგარია, რომელიც გარემოს არ აბინძურებს.

პროექტის მხარდაჭერით ასევე აშენდა ინოვაციური მარანი (ნედლი მიწის არქიტექტურა), რომლის უპირატესობებია ბუნებრივი თბოიზოლაცია, ტემპერატურის და ტენიანობის მუდმივობა, ანტიბაქტერიულობა, სეისმომედეგობა და სხვა, გარდა ამისა, მოხერხდა ეზოს კეთილმოწყობა.

ადგილობრივი განვითარების ჯგუფი საწყის ეტაპზევე დაინტერესდა ალექსანდრე დისტილერით. როგორც თეთრიწყაროს LAG-ის აღმასრულებელი დირექტორი, ნინო ტიკურიშვილი გვეუბნება, იდეა მართლაც ინოვაციური იყო, რასაც ემატებოდა მუნიციპალიტეტის ტურიზმის მიმართულებით განვითარების აუცილებლობა.

"თეთრიწყაროს ტურიზმის კუთხით დიდი პოტენციალი ჰქონდა, თუმცა არ არსებობდა შესაბამისი ინფრასტრუქტურა. ალექსანდრე დისტილერის შემთხვევაში ჩვენ საქმიანობა აგრო ტურიზმის მიმართულებით წავიყვანეთ. საწარმოში დაინერგა ახალი ტექნოლოგიები, მოეწყო მარანი, საოჯახო სასტუმრო. პროექტის ფარგლებში არსებული ტექნიკური დეტალები უკვე რამდენიმე თვეა დასრულებულია. საოჯახო მარანი და სასტუმრო იღებს ტურისტებს, მათ შორის მკვლევრებს, რომლებიც ჩამოდიან ვისკის წარმოების შესასწავლად და სხვა", — აღნიშნავს ნინო ტიკურიშვილი.

არსებული მდგომარეობის ცვლილებაზე ქალბატონი ნიაც საუბრობს:

"ინტერესი დიდია, ჩვენს საქმიანობაში ჩართულია რამდენიმე ადგილობრივი მოსახლე, გაზრდილია მათი მოტივაცია, ინტერესები, სურთ, ახალი მიმართულებებით გაიღრმავონ ცოდნა, რაც პირდაპირ კავშირშია მათი ოჯახების ცხოვრების ხარისხის გაუმჯობესებასთან", — ამბობს ის.

რაც შეეხება ალექსანდრე დისტილერისა და თეთრიწყაროს ადგილობრივი განვითარების ჯგუფის სამომავლო გეგმებს, ქალბატონი ნიას თქმით, ისინი თანამშრომლობის გაგრძელებას აპირებენ.

LAG არის სოციალური პლატფორმა, რომელიც აერთიანებს ადგილობრივი
საზოგადოების (საჯარო, კერძო და სამოქალაქო სექტორების) წარმომადგენლებს. იგი შეიმუშავებს ადგილობრივი განვითარების სტრატეგიას და ახორციელებს მრავალფეროვან სოციალურ-ეკონომიკურ საქმიანობას ადგილობრივი საზოგადოების სასარგებლოდ.

LAG-ის საქმიანობა ადგილობრივი მოსახლეობის ხედვას, ენერგიას და ჩართულობას ეფუძნება.

ევროკავშირის მხარდაჭერით ადგილობრივი განვითარების ჯგუფები უკვე 12 მუნიციპალიტეტშია ჩამოყალიბებული, ესენია: ლაგოდეხი, ბორჯომი, ყაზბეგი, თეთრიწყარო, ახალქალაქი, დედოფლისწყარო, ქედა, ხულო, წალკა, ახმეტა, წყალტუბო და მესტია. საერთო ჯამში, დღემდე, ევროკავშირის მხარდაჭერით LAG-ების მიერ დაფინანსდა სოფლის განვითარების 500-ზე მეტი ინიციატივა სოფლის მეურნეობის, ტურიზმის, სოციალური და სოფლის ინფრასტრუქტურისა და გარემოს დაცვის მიმართულებით.

შედეგად, დასაქმების შესაძლებლობები გაუჩნდა სოფლად მცხოვრებ 1000-ზე მეტ ოჯახს, ხოლო საარსებო პირობები სოფლად მცხოვრებ 10 000-ზე მეტ ადამიანს გაუუმჯობესდა. თუმცა, ადგილობრივი განვითარების ჯგუფები ბევრად მეტია ვიდრე კონკრეტული ციფრები – ისინი სოფლად მცხოვრები ადამიანების ხედვას, ენერგიას და ჩანაფიქრებს უყრიან თავს და საზოგადოებას სოფლის განვითარების საერთო მიზნის ქვეშ აერთიანებენ.

დამატებითი ინფორმაციისთვის იხილეთ კამპანიის ვებგვერდი და ფაქტები და მონაცემები.