თბილისის საზოგადოებრივ ტრანსპორტში მგზავრობის საფასურის გადახდა ნებისმიერი პლასტიკური ბარათით იქნება შესაძლებელი. თბილისის მერის მოადგილის, ირაკლი ლექვინაძის თქმით, გადახდის ახალი სისტემა მორგებული იქნება უცხოურ საბანკო ბარათებზეც:

"ახალი სისტემა გულისხმობს უფრო მეტ უნივერსალურობას, ანუ ყველა ტიპის საბანკო ბარათის წვდომას გადახდის სისტემასთან. გარდა ამისა, ნებისმიერი ჩამოსული სტუმრისთვის და თბილისის ვიზიტორისთვის ნებისმიერი პლასტიკური ბარათიდან შესაძლებელი იქნება ამ ტრანზაქციებში მონაწილეობა."

ლექვინაძის განცხადებით, ახალი სისტემა ასევე გულისხმობს ტრანსპორტის მოძრაობის ანალიზს, რაც პიკის საათების დარეგულირებას შეუწყობს ხელს:

"გადახდის ახალი სისტემა გულისხმობს შესაბამისი ანალიტიკის წარმოებას - მგზავრების მარშუტების, მათი მოძრაობების, მგზავრობების რაოდენობის შესახებ, რომელიც სრულ სურათს დაგვანახებს იმ პიკური პერიოდების შესახებ, თუ როდის არის გადატვირთულობა, როდის რამდენი საზოგადოებრივი ტრანსპორტია საჭირო, რომელ მარშუტებზეა მეტი დატვირთულობა და მთლიანობაში მოგვეხმარება დავსახოთ საზოგადოებრივი ტრანსპორტის უფრო ეფექტური გადაადგილების და მობილობის საკითხები."

მერის მოადგილის თქმით, აღნიშნულ საკითხზე მუშაობა დაწყებულია და, სავარაუდოდ, 2017 წლის ბოლოს დასრულდება.