რუსეთში გამოკითხულთა 55 პროცენტი ამბობს, რომ ოპოზიციონერი ალექსეი ნავალნის მოწამვლის არ სჯერა. საზოგადოებრივი აზრის კვლევა ლევადა ცენტრმა ჩაატარა.

კვლევის თანახმად, ნავალნის მოწამვლის ამბავს ყურადღებით თვალს მოსახლეობის მხოლოდ 18 პროცენტი ადევნებს. ამასთან, 59 პროცენტი აღნიშნავს, რომ ამის შესახებ რაღაც სმენია. 22 პროცენტი ამბობს, რომ მოწავლის თაობაზე პირველად ესმის, ხოლო ერთ პროცენტს პასუხის გაცემა უჭირს.

მათ შორის, ვისაც ნავალნის მოწამვლის შესახებ გაუგია, 55 პროცენტი ამბობს, რომ ამ ინფორმაციის არ სჯერა. 33 პროცენტი აცხადებს, რომ სჯერა ოპოზიციონერზე თავდასხმის, ხოლო 12 პროცენტს პასუხის გაცემა უჭირს.

ლევადა ცენტრმა რესპონდენტებს მოწამვლის ვერსიებთან დაკავშირებითაც ჰკითხა. ვერსიებს შორის იყო როგორც პრეზიდენტი ვლადიმერ პუტინი, ისე აშშ და ოპოზიციონერის კონკურენტები. პროცენტები ასე გადანაწილდა:

  • 30 პროცენტი — პუტინი, კრემლი, მოქმედი ხელისუფლება, სახელმწიფო დუმა, მმართველი პარტია, რუსული სპეცსამსახურები, სახელმწიფო უსაფრთხოების სამსახური;
  • 8 პროცენტი — მისი გამოძიების ფიგურანტები და ისინი, ვისაც ხელი შეუშალა ან გზაზე გადაეღობა;
  • 8 პროცენტი — აშშ, დასავლეთი, დასავლეთის სპეცსამსახურები;
  • 6 პროცენტი — კონკურენტები, ისინი, ვისაც მისი შურდა, მოწინააღმდეგე;
  • 1 პროცენტი — სხვა;
  • 47 პროცენტი — არ ვიცი/მიჭირს პასუხის გაცემა.

20 აგვისტოს ალექსეი ნავალნი თვითმფრინავში შეუძლოდ გახდა, რის შემდეგაც ის ომსკის საავადმყოფოში გადაიყვანეს. ორი დღის შემდეგ ოჯახის მოთხოვნით, ოპოზიციონერი ბერლინის კლინიკა შარიტეში წაიყვანეს. გერმანელი ექიმები მივიდნენ დასკვნამდე, რომ ნავალნი ნოვიჩოკის ჯგუფის ნივთიერებით მოწამლეს. იგივე ვერსია საფრანგეთისა და შვეიცარიის ლაბორატორიებმა.

რუსეთის ხელისუფლება აცხადებს, რომ მომხდართან კავშირი არ აქვთ, ნავალნის მოწამვლის ვერსიას უარყოფენ და გერმანიისგან უფრო მეტი ინფორმაციის მიწოდებას მოითხოვენ.